Azərbaycanda ən çox satılan məşhur saç markası ABŞ məhkəməsində - Səbəb təhlükəli xəstəlik
ABŞ-nin Arizona ştatının Baş Prokurorluğu kosmetika nəhəngi L’Oréal-a qarşı məhkəmə iddiası qaldırıb.
Şirkət kimyəvi saç düzləşdirici vasitələrlə bağlı mümkün xərçəng risklərini istehlakçılardan gizlətməkdə ittiham olunur. Bu, ABŞ-də bir ştatın sözügedən məsələ ilə bağlı istehsalçıya qarşı qaldırdığı ilk belə iddiadır.
İttihamda bildirilir ki, kimyəvi saç düzləşdirici məhsullardan, xüsusilə müntəzəm istifadə edən qadınlarda uşaqlıq (ana bətni) və yumurtalıq xərçəngi riskinin arta biləcəyi ehtimalı var.
L’Oréal ittihamları rədd edir və məhsullarının təhlükəsiz olduğunu bildirir.
Qeyd edək ki, L’Oréal məhsulları Azərbaycanda da geniş satış şəbəkəsinə malikdir və xüsusilə saç baxımı, saç boyaları və kosmetika məhsulları ilə bazarda ciddi paya sahibdir. Şirkətin məhsullarının Azərbaycanda rəsmi distribusiyasına 2020-ci ildən başlanılıb. Euromonitor International-ın 2026-cı ildə açıqladığı bazar araşdırmasına görə, L’Oréal Groupe 2025-ci ildə Azərbaycanın saç baxımı bazarında dəyər üzrə 31 faiz payla birinci yerdə olub. Bu göstərici 2020-ci ildə 22 faiz idi. Azərbaycandakı mağaza və aptek şəbəkələrində də L’Oréal-ın müxtəlif saç boyaları, şampunları, kremləri və digər saç baxımı vasitələri satışdadır.
Şirkət və digər istehsalçılara qarşı indiyədək 12 mindən çox oxşar iddianın qaldırıldığı bildirilir.
Məhkəmə proseslərinin əsas səbəblərindən biri ABŞ Milli Sağlamlıq İnstitutlarının (NIH) 2022-ci ildə açıqlanan araşdırmasıdır. Həmin araşdırmada kimyəvi saç düzləşdirici vasitələrdən tez-tez istifadə ilə uşaqlıq (ana bətni) xərçəngi riskinin artması arasında əlaqə müəyyən edilmişdi.
