Bu şəxslərin xərcini rəhbər qarşılamalıdır: 3 problem var
Qara dənizdə Azərbaycan vətəndaşlarının olduğu “TEDY” gəmisinin dron hücumuna məruz qalması azərbaycanlı dənizçilərin təhlükəsizliyi məsələsini yenidən gündəmə gətirib. Hadisə nəticəsində iki Azərbaycan vətəndaşı həlak olub, iki nəfər isə yaralanıb. Son dövrlərdə müxtəlif ölkələrdə və sularda baş verən gəmi qəzaları, dron hücumları, itkin düşmə və ölüm hallarında azərbaycanlı dənizçilərin də adları hallanır.
Azərbaycanlı dənizçilər niyə riskli sularda işləməyə məcbur qalırlar? Müharibə zonalarına yaxın ərazilərdə çalışanların təhlükəsizliyi üçün hansı tədbirlər görülür və baş verən hadisələrə görə məsuliyyət kimdədir?
Globalinfo.az-a danışan Azərbaycan Xəzər Dəniz Gəmiçiliyi” QSC-nin (ASCO) Dəniz üzgüçülüyünün təhlükəsizliyi departamenti rəisinin müavini vəzifəsində çalışmış kapitan Şahlar Məmmədov deyib ki, dənizçilik yüksək riskli peşə hesab olunur və gəmidə çalışanlar qəza, xəsarət, xəstəlik və xüsusilə münaqişə zonalarında əlavə təhlükələrlə üzləşə bilərlər:
“Buna görə dənizçilərin təhlükəsizliyi və hüquqi müdafiəsi beynəlxalq standartlarla təmin edilməlidir. Beynəlxalq Dəniz Əməyi Konvensiyasına əsasən, gəmi sahibi dənizçinin xəstəliyi, xəsarəti və ya ölümü, tibbi müalicəsi, repatriasiyası və kompensasiyası ilə bağlı maliyyə təminatı yaratmalıdır. Bununla yanaşı, müharibə zonalarında və riskli sularda çalışan dənizçilərin hərbi əməliyyatlar, piratçılıq, terrorizm və digər təhlükələrdən sığorta təminatı ilə qorunması nəzərdə tutulur”.
Ş.Məmmədov bildirib ki, gəmi sahibi heyətin bütün xərcini qarşılamalıdır:
“Gəmi sahibi heyətin sığortalanmasını təmin etməli, dənizçilərə sığorta şəhadətnaməsi və sığorta şərtləri barədə məlumat verməli, qəza və ya ölüm halında müvafiq müalicə, nəqliyyat, repatriasiya və kompensasiya xərclərini qarşılamalıdır. Dənizçilərin hüquqlarının müdafiəsində həmkarlar ittifaqları və Beynəlxalq Nəqliyyat İşçiləri Federasiyası da mühüm rol oynayır. Bununla belə, praktikada sığorta ödənişlərinin gecikdirilməsi, dənizçilərin hüquqları barədə kifayət qədər məlumatlandırılmaması və etibarsız vasitəçilər kimi problemlər qalmaqdadır. Bu səbəbdən riskli sularda çalışan dənizçilərin sığorta və hüquqi müdafiə mexanizmlərinin effektiv şəkildə təmin olunması xüsusi əhəmiyyət daşıyır”.
