“Avropa Parlamentinin Azərbaycana qarşı qərarı qərəzlidir” – Pərvanə Vəliyeva

Milli Məclisin deputatı Pərvanə Vəliyeva Xpress.az-a açıqlamasında Avropa Parlamentinin Azərbaycana qarşı qəbul etdiyi son qətnaməni şərh edib.

Deputat bildirib ki, qətnamədə yer alan müddəalar əsassızdır və ölkənin daxili işlərinə açıq müdaxilə cəhdidir. “Bu sənəd işğal dövründə və Vətən müharibəsi zamanı Azərbaycana qarşı əsassız ittihamlar irəli sürmüş, Ermənistanı dəstəkləmiş siyasi qrupların məhsuludur. Qətnamədəki iddialar qəbuledilməzdir və regionda sabitliyə təhdid yaradır. Aİ institutları ikitərəfli münasibətləri gərginləşdirən addımlardan çəkinməlidir”, – deyə Vəliyeva vurğulayıb.

O əlavə edib ki, müxtəlif cinayətlərdə ittiham olunan və istintaqı davam edən şəxslərin “siyasi məhbus” adlandırılması məhkəməyə təzyiq vasitəsidir və dövlətin suveren hüququna təsir etməyəcək.

Deputat Avropa Parlamentini insan hüquqları və demokratiyadan təzyiq vasitəsi kimi istifadə etməkdə ittiham edib: “Avropada yeni müstəmləkəçilik meylləri, xalqların assimilasiyası, sərvətlərin talan edilməsi və İslamafobiya kimi hallara diqqət yetirilmir. Ermənistanla bağlı strateji sənədlərdə isə bu məsələlər nəzərə alınmır, əksinə Azərbaycan əleyhinə ifadələr işlədilir.”

Vəliyeva bildirib ki, sənəddə “əsir” kimi qeyd olunan şəxslər müharibədən üç il sonra qanun pozuntularına görə həbs olunublar və Qarabağ, Şərqi Zəngəzurda azərbaycanlılara qarşı törədilən cinayətlərdə məsuliyyət daşıyırlar.

Deputat yekun olaraq vurğulayıb ki, bu kimi qətnamələr həm Aİ ilə münasibətlərə zərbə vurur, həm də regiondakı mövcud sabitliyi sarsıtmağa hesablanıb.

Afaq Qurbanzadə