Qalmaqallı iddia: Almaniya Obamanın telefonunu dinləyib
Almaniyanın Xarici Kəşfiyyat Xidmətinin (BND) ABŞ-ın 44-cü prezidenti Barak Obamanın telefon danışıqlarını dinlədiyi iddia olunur.
Almaniyanın "Die Zeit” qəzetində dərc olunan xəbərə görə, BND Obamanın "Air Force One” prezident təyyarəsində apardığı telefon danışıqlarını izləyib. Məlumata əsasən, sözügedən dinləmə fəaliyyəti Kanslerlik tərəfindən yalnız 2014-cü ildə dayandırılıb.
Bildirilir ki, ABŞ BND-nin rəsmi vəzifə təsnifatına görə izlənməli ölkələr sırasında yer almasa da, prezident təyyarəsindəki rabitə şifrələməsində mövcud təhlükəsizlik boşluqları səbəbindən Obamanın danışıqları dinlənilib.
Xəbərdə qeyd olunur ki, Obamaya aid danışıqların transkriptləri son dərəcə məxfi şəkildə qorunub. Dinləmələrə dair sənədlər yalnız BND rəhbəri, onun müavinləri və aidiyyəti bölmə rəhbərindən ibarət dar bir çevrədə, tək nüsxə halında dövriyyədə olub və oxunduqdan sonra məhv edilib. Əldə olunan məlumatların isə ABŞ-ın mövqeyi ilə bağlı ümumi təhlillərə çevrilərək Kanslerliyə təqdim edildiyi bildirilir.
Qəzetin yazdığına görə, bu əməliyyat Kanslerlik tərəfindən rəsmi şəkildə təsdiqlənməyib. Ofisdəki bəzi əməkdaşların vəziyyətdən nə dərəcədə xəbərdar olduğu bilinməsə də, dövrün kansleri Angela Merkelin mövzudan məlumatlı olmadığı və biləcəyi təqdirdə buna icazə verməyəcəyi qeyd olunur.
"Suddeutsche Zeitung” qəzeti isə 2014-cü ildə ABŞ-ın o vaxtkı dövlət katibi Hillari Klintonun da dinlənildiyini yazıb. Bunun ardınca Kanslerlik bu fəaliyyətin dayandırılması ilə bağlı göstəriş verib. Lakin Kanslerliyin, ABŞ prezidentinin də BND-nin nəzarətində olduğundan məlumatlı olmadığı bildirilir.
Obamaya yönəlik dinləmə fəaliyyətinin bir neçə il davam etdiyi, nə vaxt başladığı və onun sələfi Corc Buşun da hədəf alınıb-alınmadığı hələlik dəqiqləşməyib.
Həmin tarixdən sonra BND-nin ABŞ prezident təyyarəsini izləmədiyi qeyd olunur.
Xatırladaq ki, Angela Merkel 2013-cü ildə ABŞ Milli Təhlükəsizlik Agentliyinin (NSA) onu dinlədiyinin üzə çıxmasından sonra "Dostlar arasında dinləmə qəbuledilməzdir” ifadəsi ilə kəskin reaksiya vermişdi.
Angela Merkelin ofisi və BND məsələ ilə bağlı ünvanlanan sualları cavabsız qoyub.
