“Böyük güclər beynəlxalq hüquqa hörmət etmir” -Pərvanə Vəliyeva
ABŞ-nin 66 beynəlxalq təşkilatdan, o cümlədən BMT qurumlarından çəkilməsi qlobal idarəetmə sisteminə necə təsir göstərə biləcəyi və bu prosesin Azərbaycanın xarici siyasət maraqları baxımından hansı risk və imkanlar yarada biləcəyi dünya ictimaiyyətinin diqqət mərkəzindədir.
Milli Məclisin deputatı Pərvanə Vəliyeva Xpress.az-a açıqlamasında bildirib ki, ABŞ 35 beynəlxalq təşkilat və 31 BMT agentliyindən çıxır. Bunlara ECOSOC komisiyaları, UN Women, UN Alliance of Civilisations, UNFCCC, Peacebuilding Commission, Peacebuilding Fund, Avropa Şurasının Venesiya Komissiyası və digər qurumlar daxildir. Deputat qeyd edib ki, Prezident Donald Tramp ötən ilin sentyabrında BMT-nin 80 illik yubiley assambleyasında çıxışı zamanı əslində bu qərarın siqnallarını vermişdi.
Pərvanə Vəliyeva vurğulayıb ki, beynəlxalq düzəndə çoxtərəflilik uzun müddətdir böhran içindədir və hazırda bu böhran pik həddinə çatıb. Gücə əsaslanan beynəlxalq düzən BMT-nin və beynəlxalq hüququn rolunu minimuma endirib. Prezidentin yerli TV kanallarına verdiyi müsahibədə dediyi kimi, “kim güclüdürsə, hüquq onun tərəfindədir”. Deputatın sözlərinə görə, bu vəziyyətin yaranmasında əsas məsuliyyət böyük güclərin üzərinə düşür, çünki onlar beynəlxalq hüquqa hörmət etməyir və öz maraqları naminə onun norma və prinsiplərini kobud şəkildə pozurlar. Nəticədə beynəlxalq təşkilatlar qlobal və regional məsələlərdə ciddi rol oynaya bilmir və onlara ödənilən illik üzvlük haqqı faydasız görünür.
Deputat xatırladıb ki, Azərbaycan da torpaqları işğal altında olduğu dövrdə beynəlxalq hüququn işləməməsi səbəbindən ciddi problemlərlə üzləşib. 30 ilə yaxın davam edən sülh danışıqları nəticə verməyib, qeyri-qanuni işğala son qoyulmayıb. ATƏT-in Minsk qrupu uğursuz olub, 4 BMT qətnaməsi isə kağız üzərində qalıb.
Pərvanə Vəliyeva bildirib ki, hazırda dövlətlərarası münasibətlərdə əsas rol tərəfdaşlıqlar, güclü müttəfiqliklər, qarşılıqlı inam və iqtisadi fayda üzərində qurulur.
Afaq Qurbanzadə, Xpress.az
