Karta pul köçürmələrinə görə cərimələr barədə XƏBƏRDARLIQ
Federal Vergi Xidməti (FTS) bank kartlarına daxil olan bəzi pul köçürmələrini ödənilməmiş gəlir kimi qiymətləndirə və bu əsasla Rusiya vətəndaşlarına cərimə tətbiq edə bilər. Bu barədə “Mitra” Milli Hüquq Firmasının baş direktoru Yuri Mirzoyev “Prime” agentliyinə verdiyi müsahibədə bildirib.
Vəkilin sözlərinə görə, Federal Vergi Xidməti bank kartlarına edilən şübhəli köçürmələri daimi nəzarətdə saxlayır və bu əməliyyatların xarakterini təhlil edir.
Mirzoyev xatırladıb ki, əgər şəxs xidmət göstəribsə (dizayn, proqramlaşdırma, konsaltinq, repetitorluq, təmir və s.), məhsul satıbsa və ya əmlakını icarəyə veribsə və bunun müqabilində kart vasitəsilə ödəniş alıbsa, bu məbləğ gəlir hesab olunur və vergi tutulmalıdır.
Onun sözlərinə görə, hüquqi şəxslərdən və ya fərdi sahibkarlardan müntəzəm olaraq daxil olan köçürmələr vergi orqanları tərəfindən şübhəli əməliyyat kimi qiymətləndirilə bilər. Belə köçürmələr gizli əmək münasibətlərinin mövcudluğuna işarə edə bilər.
Vergilərin ödənilməməsi və ya az ödənilməsi halında cərimələr, niyyət olmadığı sübut edilərsə, ödənilməmiş məbləğin 20 faizi həcmində müəyyən edilir. Əgər vergi orqanları gəlirin qəsdən gizlədildiyini sübut edərsə, cərimə 40 faizə qədər arta bilər.
Daha əvvəl Moskva və Moskva vilayəti üzrə Hüquq və Qayda Mərkəzinin rəhbəri, vəkil Aleksandr Xaminski də Rusiya Mərkəzi Bankının bir sıra yeniliklərinin vicdanlı vətəndaşların gündəlik maliyyə fəaliyyətinə təsir göstərə biləcəyi barədə xəbərdarlıq etmişdi.
