Azərbaycan qazı artıq Avropada: Enerji təhlükəsizliyində yeni dövr başlayır
Naqif Həmzəyev: "Avropa Liderləri Azərbaycanın Enerji Təhlükəsizliyindəki Fəal Rolunu Yüksək Qiymətləndirir"
Azərbaycan qazının artıq Avstriya və Almaniya bazarlarına çıxması ölkəmizin Avropanın enerji təhlükəsizliyində rolunu daha da gücləndirir. Bəs bu addım Azərbaycanın geosiyasi mövqeyinə və Avropa İttifaqı ilə enerji əməkdaşlığının gələcək perspektivlərinə hansı strateji təsirləri göstərə bilər? Mövzu ilə bağlı Milli Məclisin deputatı Naqif Həmzəyev Xpress.az-a açıqlama verib.
Deputat bildirib ki, Azərbaycan Avropanın enerji təhlükəsizliyində aktiv rol oynayır. TAP və TANAP layihələri vasitəsilə Azərbaycan qazının Avropa bazarına çıxarılması artıq reallaşıb. Xüsusilə də Rusiya-Ukrayna müharibəsi fonunda Azərbaycan qazına tələbat daha da artıb. Bu isə Şərqi Avropa və Balkan ölkələrinin Azərbaycanla iki tərəfli və çox tərəfli enerji danışıqlarına marağını artırıb.
Naqif Həmzəyev vurğulayıb ki, bu məsələ dövlət başçısı tərəfindən dəfələrlə beynəlxalq görüşlərdə diqqətə çatdırılıb və eyni zamanda Avropa liderləri Azərbaycanın enerji təhlükəsizliyindəki fəal rolunu yüksək qiymətləndiriblər. Hazırda Avstriya və Almaniyanın Azərbaycan qazını əldə etməsi göstərir ki, interkonnektorlar vasitəsilə qazın effektiv şəkildə ötürülməsi təmin olunub. Yaxın illərdə yeni müqavilələrin imzalanması isə Azərbaycan qazının ötürülmə potensialını maksimuma çatdıracaq.
Deputat əlavə edib ki, Orta Asiyada yerləşən qardaş ölkələrin enerji resurslarının Xəzər dənizi və Azərbaycan vasitəsilə Avropa ölkələrinə çatdırılması da mümkün olacaq. Eyni zamanda, Azərbaycan yaşıl enerji resurslarının Qara dəniz dibi ilə Avropaya ötürülməsi layihəsi üzərində də aktiv işləyir ki, bu da yaxın gələcəkdə reallaşacaq.
deyə, Naqif Həmzəyev qeyd edib, “Azərbaycan günü-gündən Avropa enerji təhlükəsizliyində rolunu və önəmini artırır. Avropa İttifaqı Azərbaycanla bu sahədə əməkdaşlığa böyük əhəmiyyət verir. Klassik enerji resursları ilə yanaşı, yaşıl enerji resurslarının da Avropaya ixracı təmin olunduqdan sonra Azərbaycanın bu sahədəki payı daha da artacaq.”
Afaq Qurbanzadə, Xpress.az
