" Azərbaycan Davosdan dünyaya səs saldı" -Cavanşir Paşazadə
Prezident İlham Əliyevin Davos İqtisadi Forumunda iştirakı və dünyanın aparıcı siyasi-iqtisadi fiqurları ilə keçirdiyi görüşlər Azərbaycanın beynəlxalq mövqelərinin möhkəmlənməsi, iqtisadi əməkdaşlıqların genişlənməsi və ölkəmizin qlobal gündəmdəki rolunun artması baxımından hansı konkret müsbət nəticələr vəd etməsi əsas müzakirə mövzusudur.
Mövzu ilə əlaqəli Milli Məclisin deputatı Cavanşir Paşazadə Xpress.az-a açıqlama verib.
Deputat bildirib ki, Prezident İlham Əliyevin 2025-ci ildə həyata keçirdiyi uzunmüddətli və sistemli siyasi kurs Azərbaycanın beynəlxalq mövqelərinin möhkəmlənməsinə real təsir göstərib. Onun sözlərinə görə, bu siyasət balanslaşdırılmış diplomatiya, milli maraqlara söykənən qərarlar və regional sabitliyə yönəlmiş təşəbbüslərlə xarakterizə olunur.
Cavanşir Paşazadə qeyd edib ki, Davos İqtisadi Forumunda keçirilən yüksək səviyyəli görüşlər, Azərbaycanın beynəlxalq aləmdə əldə etdiyi nüfuz, eləcə də imzalanan yeni əməkdaşlıq və sülh yönümlü razılaşmalar ölkəmizin qlobal siyasi və iqtisadi proseslərdə fəal iştirakçıya çevrildiyini nümayiş etdirir. Bu, Azərbaycanın münaqişələrdən daha çox əməkdaşlığa üstünlük verən sülhpərvər dövlət kimi mövqeyini daha da möhkəmləndirir.
Deputatın sözlərinə görə, 2026-cı ildə həyata keçirilməsi planlaşdırılan əsas strateji layihələrdən biri olan Zəngəzur dəhlizinin açılması regionda geosiyasi balansın dəyişməsində mühüm rol oynayacaq. Bu layihə həm iqtisadi inteqrasiyanı gücləndirəcək, həm də bölgədə davamlı sülhün və sabitliyin təmin olunmasına ciddi zəmin yaradacaq. Eyni zamanda, məcburi köçkünlərin Böyük Qayıdışının sürətlənməsi Azərbaycanın post-münaqişə dövründə həyata keçirdiyi məqsədyönlü siyasətin real nəticəsi kimi qiymətləndirilir.
Afaq Qurbanzadə
