400–500 min tikili hələ də qeydiyyatsız qalıb - Nigar Alimova

Azərbaycanda sənədsiz tikililərin sayı yüz minlərlə ölçülür və bu obyektlərin mühüm hissəsinin hüquqi statusu mövcud deyil.

Xpress.az xəbər verir ki, bu barədə Daşınmaz Əmlakın Dövlət Kadastrı və Reyestri PHŞ-nin sədri Nigar Alimova “2025-ci il ərzində görülmüş işlər və qarşıda duran hədəflər” mövzusunda keçirilən mətbuat konfransında məlumat verib.

Onun sözlərinə görə, hazırda ölkə üzrə təxminən 400–500 min sənədsiz tikili mövcuddur. Qurum rəhbəri qeyd edib ki, bu tikililərin dəqiq sayının müəyyənləşdirilməsi üçün genişmiqyaslı araşdırmalara ehtiyac var.

Nigar Alimova vurğulayıb ki, Prezidentin imzaladığı müvafiq fərman qüvvəyə mindikdən sonra yüz minlərlə fərdi yaşayış evi dövlət qeydiyyatına alınıb. Lakin bu proses bütün tikililəri əhatə etmir və hər bir obyektin leqallaşdırılması hüquqi şərtlərdən asılıdır.

Onun sözlərinə görə, tikilinin yaşayış təyinatlı olması onun avtomatik olaraq qeydiyyata alınması demək deyil. Xüsusilə mühafizə zonalarında, yüksək təzyiqli qaz xətlərinin, dəmir yollarının və digər mühüm infrastruktur obyektlərinin ərazilərində inşa edilən tikililərin sənədləşdirilməsi qanunvericiliyə əsasən mümkün deyil.

“Bu cür tikililərdə yaşayan vətəndaşlar bəzi məişət xidmətlərindən istifadə edə bilirlər. Lakin obyektin hüquqi statusu müəyyənləşdirilənədək rəsmi dövlət xidmətlərinin göstərilməsi mümkün deyil,” – deyə qurum sədri bildirib.

Nigar Alimovanın sözlərinə görə, əsas məqsəd bir tərəfdən vətəndaşların mülkiyyət hüquqlarını qorumaq, digər tərəfdən isə şəhərsalma normalarına, təhlükəsizlik tələblərinə və torpaqdan düzgün istifadə prinsiplərinə əməl olunmasını təmin etməkdir.