Nazirlik universitetə, universitet nazirliyə yönləndirir – UNEC məzunları çıxılmaz vəziyyətdə
Azərbaycan Dövlət İqtisad Universitetinin (UNEC) Dərbənd filialının 2024–2025-ci tədris ili üzrə məzunları diplomlarını ala bilmədiklərini bildirirlər.
Məzunların Xpress.az-a açıqlamasında məsələ ilə bağlı müraciət etdikləri qurumlardan onlara aydın və konkret cavab verilmir. Onlar dəfələrlə Elm və Təhsil Nazirliyinə müraciət etsələr də, hər dəfə universitetə yönləndirildiklərini deyirlər.
“Müraciət etdikdə Nazirlik bildirir ki, UNEC-ə müraciət etməliyik. Universitetə yaxınlaşanda isə deyirlər ki, sənədlər hələ ötən ilin avqust ayında nazirliyə təqdim olunub və hazırda prosesə Elm və Təhsil Nazirliyi baxır”, – deyə məzunlar bildirirlər.
Məzunların sözlərinə görə, problemin həlli ilə bağlı aidiyyəti qurumların məsul şəxsləri ilə görüşmək istəsələr də, qəbul edilmirlər.
Azərbaycan Dövlət İqtisad Universitetindən verilən açıqlamada bildirilib ki, Dərbənd filialının 2024–2025-ci il məzunlarına diplomların verilməsi üçün tələb olunan sənədlər Elm və Ali Təhsil üzrə Dövlət Agentliyinə təqdim olunub. Lakin məzunlar qeyd edirlər ki, bu günə qədər Agentlikdən onlara hər hansı rəsmi məlumat verilməyib.
Nəticədə məzunlar diplomlarını ala bilmədikləri üçün işlə təmin oluna bilmədiklərini vurğulayırlar.
Qeyd edək ki, oxşar vəziyyət ötən ilin 2023–2024-cü tədris ili üzrə məzunlarının da başına gəlmişdi. Həmin məzunlar bütün dərs və imtahanlarda iştirak etmələrinə, yekun dövlət attestasiyasından müvəffəqiyyətlə keçmələrinə baxmayaraq, diplomlarını ala bilməmişdilər.
