Azərbaycanda yeni yaradılmış regional maliyyə idarələri ləğv edilib -
Azərbaycanda ötən ilin mayında yaradılan regional maliyyə idarələri, o cümlədən Bakı Şəhər Baş Maliyyə İdarəsi ləğv edilib.
Xpress.az-ın əldə etdiyi məlumata görə, ləğv edilmiş regional idarələrin əvəzinə yaradılan yeni struktur Novruz bayramından sonra fəaliyyətə başlayacaq.
Qeyd edək ki, ötən ilin may ayında Maliyyə Nazirliyi yerli bölmələrinin fəaliyyətinin təkmilləşdirilməsi və onlara münasibətdə optimal idarəetmə modelinin tətbiqi məqsədilə rayon (şəhər) maliyyə idarələrini və şöbələrini ləğv etmişdi.
Onların bazasında ölkənin yeni iqtisadi rayon bölgüsünə uyğun şəkildə regional maliyyə idarələri formalaşdırılmışdı. Yeni struktur çərçivəsində Maliyyə Nazirliyinin Abşeron-Xızı, Dağlıq Şirvan, Gəncə-Daşkəsən, Qarabağ, Qazax-Tovuz, Quba-Xaçmaz, Lənkəran-Astara, Mərkəzi Aran, Mil-Muğan, Şəki-Zaqatala, Şərqi Zəngəzur və Şirvan-Salyan regional idarələri yaradılmışdı.
