Kənan Quluzadə: “2026-cı il turizm üçün uğurlu olacaq” - VİDEO
Azərbaycan Televiziyasının (AzTV) “Həftə” analitik-informasiya proqramında turizmin inkişaf perspektivlərinə həsr edilmiş geniş reportaj yayımlanıb.
Xpress.az xəbər verir ki, reportajda 2025-ci ilin ölkə turizmi üçün “Dönüş ili” olduğu vurğulanıb.
Qeyd olunub ki, ötən il Azərbaycan turistləri sadəcə cəlb edən deyil, dayanıqlı və keyfiyyətli turizm modeli qurmaq iqtidarında olan dövlət kimi qiymətləndirilib. Növbəti illərdə təkcə Azərbaycana gələnlərin sayını artırmaq yox, onların ölkəmizdə qalma müddətini uzatmaq, xərclərini azaltmaq və məmnunluq səviyyəsini yüksəltmək əsas məqsəd olmalıdır. Bir sözlə, bu sektorda dövlət-özəl əməkdaşlığı, rəqəmsallaşma, yaşıl standartlar 2026-cı ilin “Sıçrayış ili” olacağını söyləməyə əsas verir.
Reportajda bildirilib ki, 2025-ci ildə Azərbaycana gələn xarici qonaqların sayında azalma müşahidə edilsə də, turizm sənayesində Ümumi Daxili Məhsul (ÜDM) istehsalı 7,4 faiz artıb. Ölkə turizminin qeyri-neft-qaz sektoru üzrə ÜDM-də payı isə 0,5 faiz artıb. 2026-cı ildə turizmin inkişafı ilə bağlı proqramın daha da genişləndirilməsi hədəflənib.
Reportajda Dövlət Turizm Agentliyi sədrinin müşaviri Kənan Quluzadənin fikirlərinə də yer verilib. Müşavir söyləyib ki, 2026-cı il turizm üçün uğurlu olacaq: “Biz hədəf kimi yaxın qonşu ölkələri seçmişik. Bu, ənənəvi bazarlarımızdır. Bununla yanaşı, Yaxın Şərq, İsrail, Cənubi Asiya və Çin bazarları da hədəf seçilib. Biz həm onlayn, həm də oflayn tədbirlər keçirəcəyik. Bu, sosial şəbəkələrdə rəqəmsallaşma, digital və sair marketinqin aparılmasıdır. Eyni zamanda sərgilər, rodşoular, seminarlar, veb-seminarlar keçiriləcək, müştərilərlə biznes səviyyəsində iş həyata keçiriləcək. Bütün bunların nəticəsi olaraq hesab edirik ki, 2026-cı ildə həm keyfiyyətdə, həm də kəmiyyətdə artıma nail ola biləcəyik”.
Daha ətraflı videosüjeti izləyə bilərsiniz:
