İT layihələri necə uğurla idarə olunur? — STEP IT Academy-də praktiki seminar

Step IT Academy-də “İT layihələrinin idarə edilməsi” mövzusunda seminar keçirilib.

Tədbirdə İT Station şirkətinin direktoru Bünyad Həbibov, İT layihələndirmə şöbəsinin rəhbəri Naib Həsənov və şirkətin texnologiya direktoru (CTO) Eşqin Nuruşov çıxış edib. Seminar çərçivəsində iştirakçılara İT layihələrinin planlaşdırılması, idarə olunması və uğurla icrası ilə bağlı ətraflı məlumat verildi.

Spikerlər İT layihələrində vaxtın düzgün planlaşdırılmasının, büdcənin effektiv idarə edilməsinin və proseslərin sistemli şəkildə qurulmasının layihənin ümumi nəticəsinə birbaşa təsir etdiyini vurğulandı. Bildirildi ki, layihənin başlanğıc mərhələsində düzgün analiz və məqsədlərin dəqiq müəyyənləşdirilməsi gələcək risklərin minimuma endirilməsinə imkan yaradır.

Seminarda həmçinin layihələrin idarə olunmasında komanda işinin rolu, tapşırıqların bölgüsü, prioritetləşdirmə və monitorinq mexanizmləri barədə danışıldı. Real iş təcrübəsinə əsaslanan nümunələr təqdim olunub, qarşılaşılan çətinliklər və onların həlli yolları iştirakçılarla bölüşüldü.

Tədbir interaktiv formatda təşkil olunub, tələbələr və iştirakçılar öz suallarını ünvanlayaraq praktik biliklərini artırmaq imkanı əldə etdilər.

Qeyd olundu ki, bu kimi seminarlar gənc mütəxəssislərin peşəkar inkişafına və İT sahəsində layihə idarəetməsi bacarıqlarının formalaşmasına mühüm töhfə verir.