Kimlərə qulluq dövrü pensiya stajına daxil edilir? – Rəsmi izah

Əmək pensiyasının hesablanması zamanı bəzi qulluq dövrlərinin sığorta stajına daxil edilib-edilməməsi vətəndaşlar tərəfindən tez-tez soruşulan məsələlərdəndir.

Dövlət Sosial Müdafiə Fondunun İctimaiyyətlə Əlaqələr Departamentinin müdiri Rəşad Məhdilinin açıqlamasına görə, qanunvericilikdə müəyyən kateqoriyalara qulluq müddətinin sığorta stajına daxil edilməsi nəzərdə tutulur.

Xpress.az Oxu24.com-a istinadla bildirilir ki, əmək pensiyası hüququ müəyyən edilərkən, müvafiq icra hakimiyyəti orqanının qərarı ilə 81–100 faiz orqanizm funksiyalarının pozulmasına görə əlilliyi olan şəxslərə və ya əlilliyi olan uşaqlara qulluq müddəti sığorta olunan şəxsin əmək stajına əlavə edilir.

Eyni zamanda, yaşlı şəxslərə – xüsusilə 70 yaşdan yuxarı və müəyyən hallarda 60 yaşdan yuxarı insanlara qulluq edildiyi müddət də qanunvericiliyə uyğun olaraq sığorta stajına daxil edilə bilər.

Qeyd olunur ki, bu dövrlər əmək pensiyası hüququnun müəyyən olunmasında nəzərə alınır və vətəndaşın ümumi pensiya hesablanmasına təsir göstərir.