İnsan üçün ən böyük SƏRMAYƏ - FOTO
Mənim üçün ən vacib məsələlərdən biri təhsildir. Həyatda ilk diqqət etdiyim məqam da məhz budur. İnanıram ki, insan həyatının hansı mərhələsindədirsə, ətrafına da əsasən həmin düşüncə tərzinə və oxşar dəyərlərə sahib insanları çəkir.
Uyğunsuzluq yarandıqda isə yollar ayrılır. Ya sən inkişaf edərək irəli gedirsən, ya da qarşı tərəf. Nəticədə ortaq baxış və məqsədlər itdikcə insanlar təbii şəkildə bir-birindən uzaqlaşırlar.
Məncə, insanın edə biləcəyi ən böyük sərmayə - yatırım özünə etdiyi yatırımdır. İki-üç il əvvəl belə düşünmürdüm. Amma bu gün inanıram ki, bir insan 700 AZN maaş alıb onun hamısını bahalı bir çantaya xərcləyə də bilər, eyni məbləği öz inkişafına yönəldərək gələcəyinə sərmayə qoya da bilər. Hətta ən idealı hər ikisi arasında balans qurmaqdır. Çünki istifadə etdiyin əşyaların dəyəri zamanla azalır, amma qazandığın bilik, bacarıq və təcrübə ömür boyu səninlə qalır.
Bu düşüncənin mahiyyətini dərk etdiyin andan etibarən bəzi söhbətlər, bəzi mühitlər və bəzi məşğuliyyətlər sənə artıq maraqsız görünməyə başlayır. Çünki anlayırsan ki, səni irəli aparacaq insanlar sənin kimi düşünən, öyrənməyə və inkişaf etməyə həvəsli olan insanlardır.
Mənim üçün başqa bir vacib məqam isə təkcə özünü inkişaf etdirmək deyil, ətrafına da faydalı ola bilməkdir. Əgər sən getdiyin doğru yola başqalarını da həvəsləndirə, onların inkişafına kiçik də olsa töhfə verə bilirsənsə, deməli qazandığın bilik yalnız sənə deyil, cəmiyyətə də xidmət edir. Məncə, ən böyük mükafat da elə budur.
Aytac MUSTAFAZADƏ
Müəllim
