“Bakı Metropoliteni”nin qərarı ETİRAZ DOĞURDU: Analoqu olmayan DƏLƏDUZLUQ - VİDEO + FOTO
“İşə gəlib-getmək üçün hər gün “Xalqlar dostluğu” metro stansiyasından minib “Dərnəgül”dən çıxıram. 1 manat 20 qəpik xərcləyirəm. İndi ən azı 10 ay ərzində 3 manat 60 qəpik xərcləməliyəm. Yəni, əlavə 2 manat 40 qəpik. “28 May”da düşüb avtobusa minməli, “Nizami”də yenidən metroya daxil olmalıyam və hər birində də 60 qəpik gediş haqqı ödəməliyəm, qayıdanda da eyni qaydada. Beləliklə, minimum 20 iş günündə əlavə olaraq 48 manat məndən (pul) alacaqlar. Minimum 10 ayda isə 480 manat. Bir vətəndaşdan. İndi bunu vurun yüz minlərə. Nəinki Cənubi Qafqazda, dünyanın heç bir yerində belə dələduzluğun analoqu yoxdur”.
Xpress.az xəbər verir ki, bu barədə jurnalist Natiq Muxtarlı sosial media hesabında paylaşım edib.
Bununla o, avqustun 15-dən “Bakı Metropoliteni”ndə Qırmızı və Yaşıl xətlərin ayrılması layihəsinin əsas tikinti mərhələsinə başlanılması çərçivəsində “Nizami” – “28 May” stansiyaları arasında qatarların fəaliyyət göstərməməsinin yaradacağı çətinliyə, vətəndaşların üzləşəcəyi maliyyə itkisinə diqqət çəkib.
Xatırladaq ki, “Bakı Metropoliteni” QSC bugünlərdə bu barədə məlumat yayıb. Bildirilib ki, tikinti işləri təxminən 10-11 ay davam edəcək. Bu müddət ərzində qatarlar “Nizami" – "28 May” mənzili arasında fəaliyyət göstərməyəcək.
Qeyd olunub ki, layihə Azərbaycan Prezidenti İlham Əliyevin Sərəncamı ilə təsdiqlənmiş “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”na uyğun həyata keçirilir.
Məlumata görə, layihənin əsas məqsədi Qırmızı və Yaşıl xətlər arasında mövcud asılılığı aradan qaldırmaq, stansiyalarda sıxlığı azaltmaq, qatarlararası intervalı minimuma endirmək və hərəkətin dayanıqlılığını təmin etməkdir.
Hazırda “28 May” stansiyasının platformasında müxtəlif istiqamətlərə gedən sərnişinlər eyni platformadan istifadə edir ki, bu da xüsusilə pik saatlarda sıxlıq yaradır. Layihə başa çatdıqdan sonra “İçərişəhər” istiqamətinə gedən sərnişinlər “28 May”, “Dərnəgül” istiqamətinə gedənlər isə “Cəfər Cabbarlı” stansiyasının platformasından istifadə edəcəklər.
Bununla yanaşı, “28 May” və “Cəfər Cabbarlı” stansiyalarını birləşdirən ikinci sərnişin pilləkəninin tikintisi də yekunlaşmaq üzrədir. Yeni keçid sərnişinlərin stansiyalar arasında daha rahat və sürətli hərəkətinə imkan verəcək.
Tikinti çərçivəsində “Dərnəgül” elektrik deposunun inşasının ikinci mərhələsi tamamlanmaq üzrədir və “Cəfər Cabbarlı–Nizami” mənzilini birləşdirəcək 200 metrlik yeni tunellərin tikintisinə başlanılacaq.
