Paşinyan Moskvaya CAVAB VERDİ: Ermənistan üçün “ÜÇÜNCÜ YOL” elan etdi
Ermənistan Avropa İttifaqına üzvlük məsələsi ilə bağlı referendum keçirəcək. Lakin bu, əvvəlcə hazırlıq işləri aparıldıqdan və ölkənin Aİ-yə üzvlüklə bağlı rəsmi müraciətindən sonra baş verəcək.
Xpress.az xəbər verir ki, bunu Ermənistanın baş naziri Nikol Paşinyan bildirib.
“Biz gələcəkdə mütləq referendum keçirəcəyik. Lakin bu, birincisi, institusional baxımdan hazırlıq işləri aparıldıqdan, ikincisi isə üzvlüklə bağlı Avropa İttifaqına rəsmi müraciət etdikdən sonra baş verəcək”, - deyə o, brifinq zamanı bildirib.
Paşinyanın fikrincə, Ermənistan vətəndaşları Avrasiya İqtisadi İttifaqı (Aİİ) və Avropa İttifaqı ilə əlaqəli olmayan üçüncü inkişaf yolunu da seçə bilərlər.
“Biz bu iki (birliyi) göstəririk, amma başqa təşəbbüs də ola bilər: nə Aİİ, nə də Aİ. Üçüncü variant da mümkündür... Biz Ermənistan vətəndaşları üçün alternativlər yaratmaq istəyirik ki, xalq özü seçim etsin. Lakin bu gün biz dördüncü, beşinci alternativ barədə də düşünməkdən əl çəkmirik. Çünki kimsə Ermənistanın heç kimə lazım olmadığını və onun gedəcək yerinin olmadığını deyə biləcəyi vəziyyət yaranmamalıdır”, - deyə Ermənistanın baş naziri bildirib.
Avqustun 11-də Rusiyanın xarici işlər nazirinin müavini Mixail Qaluzin TASS-a müsahibəsində bildirib ki, Ermənistan cari ilin dekabr ayına qədər Avropa İttifaqına qoşulmaq, yaxud Aİİ-də üzvlüyünü qoruyub saxlamaqla bağlı ümumxalq referendumunun keçirilməsi məsələsində qərar verməlidir.
Qaluzinin sözlərinə görə, dekabr ayında Aİİ-yə üzv dövlətlərin liderlərinin görüşündə İrəvana münasibətdə gələcək mümkün addımlar müzakirə olunacaq.
