Məsafədən idarə olunan pətəklər: Lənkəranda arıçılıqda yeni texnoloji mərhələdir

Lənkəranlı sahibkar Səyavuş Yaqubov regionda ənənəvi təsərrüfat modelini müasir texnologiyalarla bir araya gətirərək innovativ arıçılıq sahəsində mühüm yeniliklərə imza atır. Dövlət Turizm Agentliyinin təşkil etdiyi mediatur zamanı verilən açıqlamaya əsasən, sahibkar KOBİA-nın qrant müsabiqəsinin qalibi olub və "Şəhərdən-kəndə" layihəsi çərçivəsində Aqrar Tədarük və Təchizat ASC ilə "PAŞA Holding"in maliyyə dəstəyi sayəsində xüsusi arıçılıq muzeyi təsis edib.
Muzeydə arı məhsullarının istehsalı ilə yanaşı, regionda ilk dəfə tətbiq edilən apiterapiya (arı məhsulları ilə müalicə) xidmətləri və arı havası ilə istirahət otaqları fəaliyyət göstərir. Bu müalicə metodları mərkəzi sinir sistemini sakitləşdirmək, zehni fəaliyyəti bərpa etmək və immun sistemini gücləndirmək məqsədilə təklif olunur.
Təsərrüfatda tətbiq edilən əsas texnoloji yenilik isə arı pətəklərinin altına yerləşdirilən smart tərəzi sistemidir. Bu qurğular vasitəsilə pətəkdəki çəki dəyişmələri, rütubət və temperatur göstəriciləri distant şəkildə SMS vasitəsilə sahibkara ötürülür və təsərrüfatın məsafədən tam nəzarətdə saxlanılmasına imkan yaradır.