Lənkəran niyə turistlərin diqqətini çəkir? – Regional Turizm İdarəsinin rəisi açıqladı

Lənkəran cənub bölgəsinin incisi olmaqla yanaşı, Azərbaycanın turizm baxımından ən diqqətçəkən destinasiyalarından biridir.

Xpress.az xəbər verir ki, bu barədə Lənkəran Regional Turizm İdarəsinin rəisi İlqar Əzimov Dövlət Turizm Agentliyinin təşkilatçılığı ilə keçirilən mediatur zamanı jurnalistlərə açıqlamasında danışıb.
İlqar Əzimov bildirib ki, Lənkəranın əsas üstünlüklərindən biri dağ və dəniz kimi fərqli təbiət imkanlarının bir ərazidə cəmlənməsidir. Onun sözlərinə görə, bu xüsusiyyət şəhərin turizm potensialını daha da artırır.
Regional Turizm İdarəsinin rəisi qeyd edib ki, son illər Lənkəranın turizm imkanlarından daha səmərəli istifadə olunması istiqamətində müxtəlif layihələr həyata keçirilir. Dövlətin turizm sahəsinə göstərdiyi diqqət və dəstək nəticəsində bölgədə bu istiqamətdə mühüm işlər görülür.
İ.Əzimov Lənkəranın zəngin milli kulinariya ənənələrinə də diqqət çəkib. O bildirib ki, yerli mətbəxin tanıdılması istiqamətində Dövlət Turizm Agentliyi və Azərbaycan Turizm Bürosu tərəfindən həm ölkə daxilində, həm də beynəlxalq tədbirlərdə təbliğat işləri aparılır.
Onun sözlərinə görə, turistlərin bölgə haqqında daha rahat məlumat əldə etməsi üçün Lənkəranda turizm informasiya məntəqəsi də fəaliyyət göstərir.
Məntəqədə həftənin bütün günləri, o cümlədən bayram günlərində turistlərə Lənkəranın turizm imkanları, gəzməli-görməli məkanları və digər istiqamətlər barədə məlumat verilir.