Lənkəranlı sahibkar: Cəmi 5 bambukla başladığım təsərrüfat indi 32 sotluq plantasiyadır
Dövlət Turizm Agentliyinin Lənkərana təşkil etdiyi mediatur çərçivəsində jurnalistlərə açıqlama verən Talışlı kənd sakini, fərdi sahibkar Eynulla Cəlalov bildirib ki, 32 sotluq sahəni əhatə edən bambuk plantasiyası bölgəyə gələn qonaqların böyük marağına səbəb olur.
Torpaq sahəsini 1990-cı illərdə aldığını deyən sahibkar təsərrüfatın təməlini çay kənarında əkdiyi ilk bambuk kolları ilə qoyub:
"Hər koldan ayrılan 4–5 yeni pöhrəni götürüb təpəlik ərazilərdə əkdim. Sənətkarlıq klubunda işlədiyim dövrdə sərgilər üçün suvenirlər hazırlamaq lazımdı. İlk dəfə bu bambuklardan kreslo, masa və müxtəlif xırda suvenirlər düzəldib sərgiyə çıxartdım. Əl işlərim böyük maraqla qarşılandı, televiziya çəkilişlərindən sonra isə sifarişlərin sayı kəskin artdı.
32 sotluq sahədə yetişdirilən bambuklar yüksək məhsuldarlığı və sürətli böyüməsi ilə seçilir. Ölkə üzrə yalnız Lənkəran-Astara zonasında bitən bu bitki tam boy səviyyəsinə cəmi 48–50 gün ərzində çatır. Təsərrüfat kifayət qədər gəlirlidir. Regionda məhz bu miqyasda bambuk sahəsinə və emalına malik olduğumuz üçün təsərrüfatımız xüsusi xəritəyə də daxil edilib.
Burada əldə edilən xammaldan bağ mebelləri və suvenirlər hazırlanır. Eyni zamanda məhsullar daxili bazara — Bakıdakı dekorasiya işləri və kənd təsərrüfatının müxtəlif sahələri üçün təqdim olunur".
