“Baku Research Institute”un arxasındakı təlxəklər Azərbaycanı parçalamaq istəyirlər” – MÖVQE + FOTO
Mən daxili siyasət haqqında nadir hallarda yazıram. Mənim ixtisasım beynəlxalq münasibətlərdir. Amma bir fakt var ki, onu qeyd etmədən keçmək mümkün deyil.
Bir müddət əvvəl “Baku Research Institute” (Bakı Tədqiqat İnstitutu) erməni müəllif Vigen Çeteryanın Azərbaycan əleyhinə yazılmış məqaləsini dərc edib. (https://bakuresearchinstitute.org/en/the-unbearable-cost-of-azerbaijans-territorial-integrity/). Məqalə yalnız ingilis dilində yayımlanıb və Azərbaycan dilində versiyası yoxdur.
Əlbəttə, kimsə bunu söz azadlığı və fərqli mövqelərin ifadəsi ilə izah edə bilər. Amma sözügedən məqalə saxtakarlıqlara, Çeteryan kimi erməni radikallarının və millətçilərinin münaqişəyə baxışlarına əsaslanıb. Belə olan halda sual yaranır: insan hüquqları və Azərbaycan tarixinə dair araşdırmaları əsas fəaliyyət istiqaməti kimi müəyyən edən bir institutun portalında Azərbaycanın ərazi bütövlüyünə qarşı məqalənin yayımlanması nə dərəcədə doğrudur?
Məqalədə belə bir hissə var: “2023-cü il sentyabrın 19-da Azərbaycan ordusu de-fakto Dağlıq Qarabağ respublikasının müdafiə mövqelərinə tam miqyaslı hücum həyata keçirdi. Hücum heç bir açıq-aşkar əsas olmadan baş verdi. Belə ki, Azərbaycan hakimiyyəti ilə Dağlıq Qarabağ rəhbərliyi arasında danışıqlar davam edirdi”.
Daha sonra isə belə yazılır: “Bundan sonra baş verənlər XXI əsrin ən effektiv etnik təmizləməsi oldu. Bir neçə gün ərzində Dağlıq Qarabağın bütün erməni əhalisi öz torpağından qovuldu.”
Məqalə münaqişənin tarixini və ərazi bütövlüyü prinsipini tamamilə başqa cür təqdim edir, ermənilər isə münaqişənin yeganə qurbanı kimi göstərilir.
Çeteryan bunu yaza bilər. Amma Parisdə oturub Azərbaycan xalqının hüquqları barədə yüksək səslə danışan, özünü böyük liberal, bizi isə avtokrat adlandıran həmin təlxək (halbuki mən heç vaxt opponentlərimə qarşı belə ifadələr işlətməmişəm) açıq şəkildə kiminsə sifarişini yerinə yetirir.
Deməli, onların məntiqinə görə, biz işğalı, dağıntıları, qətlləri unutmalı və Qarabağı təhvil verməli idik. Paşinyan Şuşada rəqs edib “Qarabağ Ermənistandır” deyəndə böyük “demokrat”, biz isə ərazi bütövlüyünün bərpası və qaçqınların qayıtması lazım olduğunu deyəndə “avtokrat” oluruq.
Bu yazıma cavab olaraq o və onun kimiləri deyəcəklər ki, biz Qarabağ məsələsinin arxasında gizlənməyə çalışırıq.
Mən 1990-cı illərin faciəsini öz gözlərimlə görmüşəm. Eyni zamanda, “intellektual üfunət”in tüstüsünü yayan boşboğazların söylədiklərinin hara gətirib çıxara bildiyini də görmüşəm.
Buna görə də nəticə birdir: “Baku Research Institute” üçün Azərbaycan və Azərbaycan xalqının maraqları əhəmiyyətsizdir. Bu institut və onun arxasındakı təlxəklər Azərbaycanı parçalamaq istəyənlərin sifarişini yerinə yetirirlər.
Fərid ŞƏFİYEV
Beynəlxalq Münasibətlərin Təhlili və Multikulturalizm Mərkəzi İdarə Heyətinin sədri
