Trampın sülh təşəbbüsləri və Azərbaycanın nümunəvi rolu
ABŞ Prezidenti Donald Trampın Asiyada sülhün təşviqi istiqamətində atdığı addımlar, eləcə də Azərbaycan və Ermənistan münasibətlərində göstərdiyi təşəbbüslər onun qlobal sabitliyə verdiyi töhfə kimi dəyərləndirilə bilər. Lakin Trampın Rusiya ilə münasibətlərinə fərqli yanaşması diqqət çəkir.
Mövzu ilə bağlı Milli Məclisin deputatı Tural Gəncəliyev Xpress.az-a açıqlama verib. Deputat bildirib ki, Azərbaycan və Ermənistan arasında hazırda formalaşan konstruktiv mühit müharibədən sonrakı dövrdə atılan sülh addımlarının nəticəsidir.
“İki ölkə arasında münasibətlərin normallaşdırılması və sülh sazişinin hazırlanması məqsədilə xarici işlər nazirləri tərəfindən ABŞ-da sənədin paraflanması bu istiqamətdə atılmış mühüm addımdır. Bu, bir daha göstərdi ki, sülhün bərqərar olunmasında əsas rol Azərbaycan Prezidentinə — cənab İlham Əliyevin konstruktiv mövqeyi və təşəbbüslərinə məxsusdur”, — deyə deputat vurğulayıb.
Onun sözlərinə görə, ABŞ-da keçirilən üçtərəfli görüşdə sənədlərin imzalanması, Prezident Trampın iştirakı və şahidliyi ilə baş tutaraq prosesin beynəlxalq legitimliyini daha da möhkəmləndirib.
Deputat qeyd edib ki, Rusiya ilə ABŞ arasında münasibətlərin gərginləşməsi, Budapeşt görüşünün təxirə salınması və Alyaska danışıqlarının nəticəsiz qalması qlobal sülh prosesinə mənfi təsir göstərir.
“Rusiya-Ukrayna müharibəsi, enerji infrastrukturuna zərbələr və nüvə başlıqlı raketlərin yerləşdirilməsi ilə bağlı müzakirələr vəziyyətin təhlükəli həddə çatdığını göstərir. Moskvanın nüvə triadasını aktivləşdirməsi və raket təlimləri keçirməsi NATO və ABŞ-a yönəlik xəbərdarlıq kimi qiymətləndirilir”, — deputat əlavə edib.
Tural Gəncəliyev vurğulayıb ki, bu gərgin beynəlxalq şəraitdə Ermənistan–Azərbaycan münaqişəsinin məhz Azərbaycanın siyasi iradəsi və diplomatik bacarığı nəticəsində sülh yolu ilə həll olunması xüsusi əhəmiyyət daşıyır.
“Bu, Prezident İlham Əliyevin müdrik və praqmatik siyasətinin bəhrəsidir. Azərbaycanın bu istiqamətdə əldə etdiyi uğurlar dünya miqyasında sülh və diplomatiya nümunəsi kimi dəyərləndirilə bilər.”
AFAQ
