Azərbaycan məhdudiyyətləri aradan qaldırdı, növbə Ermənistandadır deputatdan açıqlama
Cənubi Qafqazda sülh prosesinin gedişi və regional əməkdaşlıq imkanlarının genişlənməsi fonunda Ermənistanın atacağı addımlar xüsusi diqqət mərkəzinə çevrilib. Xüsusilə, infrastruktur və nəqliyyat əlaqələrinin açılması istiqamətində qəbul olunacaq mümkün qərarlar regionun gələcək geosiyasi mənzərəsini dəyişə bilər. Mütəxəssislər hesab edirlər ki, bu proses yalnız iqtisadi deyil, həm də siyasi balans baxımından mühüm nəticələr doğura bilər. Məsələ ilə bağlı deputat Azər Badamov Xpress.az-a müsahibəsində fikirlərini bölüşüb.
Deputat bildirib ki, Azərbaycan Ermənistana daşınacaq tranzit yüklərinə tətbiq olunmuş məhdudiyyətləri aradan qaldırıb. “Təbii ki, uzun illər dünyadan təcrid olunmuş Ermənistana qarşı tətbiq edilən bu məhdudiyyətlərin aradan qaldırılması Azərbaycanın sülh gündəliyinə sadiqliyinin bariz nümunəsidir,” – deyə o qeyd edib.
Azər Badamovun sözlərinə görə, tranzit yüklərlə bağlı məhdudiyyətin götürülməsi Ermənistan üçün son dərəcə vacib idi, çünki bu ölkənin yükdaşıma marşrutları çox məhduddur. “Azərbaycan bu addımı atmaqla Ermənistana ilin bütün günlərində rahat şəkildə yükdaşımalar həyata keçirməyə imkan yaradıb,” – deputat vurğulayıb.
O əlavə edib ki, Ermənistan da öz növbəsində ərazisindən Azərbaycan tranzit daşımalarına qoyulan məhdudiyyətləri aradan qaldırdığını bəyan edib. Lakin deputatın fikrincə, Azərbaycan üçün Ermənistan üzərindən yüklərin daşınması hələlik aktual deyil:
“Bu prosesin baş tutması üçün Türkiyə–Ermənistan və Azərbaycan–Ermənistan sərhədləri açılmalıdır. Hazırda bu sərhədlər bağlı olduğundan, Ermənistanın açıqlamaları hələlik yalnız söz olaraq qalır. Sərhədlərin açılması isə yekun sülh müqaviləsinin imzalanmasından keçir. İki ölkə arasında sülh olmadan sərhədlərin açılması mümkün deyil.”
Deputat əlavə edib ki, Ermənistan konstitusiyasında müvafiq dəyişikliklər edərək yekun sülh müqaviləsini imzalamalıdır. Bu, regionda kommunikasiya xətlərinin açılması üçün əsas şərtlərdən biridir.
Azər Badamov həmçinin Zəngəzur dəhlizi məsələsinə də toxunub:
“Ermənistan çalışmalıdır ki, Azərbaycanın bu məhdudiyyəti aradan qaldırması fonunda Zəngəzur dəhlizinin açılması istiqamətində səylərini intensivləşdirsin. Əgər Ermənistan bu məsələlərdə real addımlar atarsa, o zaman regional sülh və əməkdaşlığın inkişafına töhfə vermiş olar.”
Deputatın sözlərinə görə, hələlik Ermənistanın açıqlamaları yalnız kağız üzərində qalır:
“İstəyərdik ki, Ermənistan da sülh və əməkdaşlığın inkişafı istiqamətində praktiki addımlar atsın.”
Afaq Qurbanzadə
