“Əsas məqsəd birləşmək deyil”- Elmar Məmmədyarovla ÖZƏL MÜSAHİBƏ
Dini bir,dili bir olan Azərbaycan və Türkiyə qardaşlığı bütün dünyaya örnək oldu. Son dövrlər atılan addımlar türk və Azərbaycan dostluğunu dahada möhkəmləndirir. Lakin son vaxtlar Türkiyə Azərbaycanın birləşməsi istiqamətində də fikirlər yayılmaqdadır. Məsələyə sabiq XİN Elmar Məmmədyarov Xpress.az saytına müsahibəsində aydınlıq gətirib.
- Cənab Məmmədyarov, Azərbaycanın tarixinə nəzər salsaq, SSRİ-yə daxil olduğu dövrdə dövlətçiliyimizə hansı təsirlər müşahidə olunurdu?
-Azərbaycanın tarixinə baxdıqda görürük ki, 1922-ci ildə ölkəmiz SSRİ-yə daxil olarkən, xarici siyasət və müdafiə məsələləri Moskvanın səlahiyyətinə verilmişdi. Bu, həmin dövrün siyasi reallıqlarından irəli gəlirdi. Beləliklə, Azərbaycan xalqı faktiki olaraq müstəqilliyinin mühüm hissəsini itirmişdi. SSRİ Konstitusiyasına əsasən, ittifaq respublikaları öz xarici siyasətlərini və müdafiə istiqamətlərini mərkəzlə — yəni Moskva ilə — uzlaşdırmalı idilər. Bu isə təbii olaraq dövlət suverenliyinin məhdudlaşdırılması demək idi.
- Müstəqilliyin bərpasından sonra Azərbaycan bu tarixi təcrübədən hansı nəticələr çıxardı?
Bu gün tamamilə fərqli bir dövrdə yaşayırıq. Müstəqil Azərbaycan öz xarici və müdafiə siyasətini tam şəkildə özü müəyyənləşdirir. Bu, dövlətçiliyimizin möhkəmlənməsinin, müstəqil siyasət yürütmə qabiliyyətimizin və beynəlxalq arenada etibarlı tərəfdaş kimi formalaşmağımızın əsas göstəricisidir.
-Azərbaycan–Türkiyə münasibətləri bu baxımdan hansı əhəmiyyətə malikdir?
Azərbaycan–Türkiyə müttəfiqliyi beynəlxalq münasibətlər sisteminə mühüm və müsbət təsir göstərir. Bu əməkdaşlıq regionda sabitliyin qorunmasına, eyni zamanda iqtisadi və siyasi tərəfdaşlığın dərinləşməsinə xidmət edir. Mən bu münasibətlərin daha da möhkəmlənməsini tam şəkildə dəstəkləyirəm. Bu, iki qardaş xalqın ortaq maraqlarını təmin edən və dövlət müstəqilliyini möhkəmləndirən strateji əməkdaşlıq modelidir.
- Bəzi dairələrdə Türkiyə və Azərbaycanın birləşməsi ideyası səslənir. Siz bu barədə nə düşünürsünüz?
Bu, çox ciddi və məsuliyyətli bir məsələdir. Birləşmə o deməkdir ki, hər iki dövlət suverenlik məsələsində ortaq qərara gəlməlidir. Mən hesab edirəm ki, bu kimi mühüm məsələlər yalnız ümumxalq referendumu vasitəsilə müzakirəyə çıxarılmalıdır. Dövlətçilik baxımından belə bir qərar yalnız xalqların iradəsinə əsaslanmalıdır.
- Sizcə, bu birləşmə ideyasının yaxın gələcəkdə reallaşması mümkündürmü?
-Bu barədə konkret fikir söyləmək çətindir. Mənim fikrimcə, əsas məqsəd birləşmək deyil, siyasi, iqtisadi və mənəvi sahələrdə müttəfiqliyi daha da dərinləşdirmək olmalıdır. Azərbaycan və Türkiyə arasında strateji əməkdaşlığın güclənməsi təkcə iki ölkə üçün deyil, bütövlükdə regionun gələcəyi üçün mühüm əhəmiyyət daşıyır.
Afaq Qurbanzadə
