“Zəfərimiz yeni dövrün başlanğıcıdır” – Hicran Hüseynova

Bu barədə Milli Məclisin Ailə, Qadın və Uşaq Məsələləri Komitəsinin sədri Hicran Hüseynova Xpress.az-a danışıb.

Hicran Hüseynova bildirib ki, Şanlı Qələbəmizin 5 ili tamam olur və bu, çox şərəfli, tarixi hadisədir. Azərbaycan ədalətli mübarizə apararaq uzunmüddətli işğala son qoydu, ərazi bütövlüyünü və suverenliyini bərpa etdi.

 “Prezident, Ali Baş Komandan İlham Əliyevin rəhbərliyi ilə yüksək hazırlıqlı, mərd və igid əsgər və zabitlərimiz torpaqlarımızı addım-addım düşməndən azad etdilər. 44 günlük Vətən müharibəsində qazanılan bu Qələbə təkcə Qafqaz və Avrasiya üçün deyil, qlobal miqyasda da mühüm hadisə kimi tarixə düşdü. Prezident İlham Əliyevin qətiyyəti sayəsində Azərbaycan bu gün iqtisadi, strateji və geosiyasi baxımdan güclü, müstəqil siyasət yürüdən bir dövlətdir.”

Deputatın sözlərinə görə, 44 günlük müharibə və cəmi bir gündən az davam edən antiterror əməliyyatı xalqımızın sarsılmaz birliyini bütün dünyaya nümayiş etdirdi:

“Azərbaycanda yaşayan bütün xalqlar çiyin-çiyinə mübarizə apardılar. Şəhid ailələrinə və qazilərə dövlət səviyyəsində xüsusi diqqət və qayğı göstərilir. Prezident İlham Əliyevin rəhbərliyi ilə ‘Qəhrəmanlara ehtiram – vətənə sədaqət’ prinsipi dövlət siyasətinin əsas istiqamətlərindən birinə çevrilib.”

Hicran Hüseynova əlavə edib ki, bu Zəfər xalqımızın milli kimliyinin, özünəinamının və qürurunun yenidən doğuluşuna səbəb olub:

“Zəfərimiz ‘məğlub xalq’ sindromunu sındırdı, Xocalı soyqırımının qisası alındı. Bütün dünya gördü ki, Azərbaycan xalqı heç vaxt məğlubiyyətlə barışmayacaq və hər zaman haqqını qorumağa qadirdir. Bu Qələbəni bizə yaşadan bütün şəhidlərimizin ruhu qarşısında baş əyir, qazilərimizə sağlamlıq arzulayıram. 8 Noyabr – Zəfər Bayramı münasibətilə xalqımızı ürəkdən təbrik edirəm. Azərbaycanın gücü, birliyi və əzmkarlığı daim qalib olacaq, üçrəngli bayrağımız əbədi olaraq bütün torpaqlarımızda dalğalanacaq!”

Afaq Qurbanzadə