Elşad Mirbəşir oğlu: Ermənistan sülh sazişinə doğru addım atır
Cənubi Qafqazda sülh sazişinin imzalanması istiqamətində aparılan danışıqlar region siyasətinin əsas mövzusudur. Ermənistanın mövqeyi və prosesdə real dəyişikliklərin olub-olmaması isə siyasətçilərin diqqət mərkəzindədir. Mövzu ilə bağlı sabiq millət vəkili, siyasi elmlər doktoru Elşad Mirbəşir oğlu Xpress.az saytına açıqlamasında bildirib ki, 2025-ci il Azərbaycan və Ermənistan arasında sülh sazişi üçün mühüm imkanlar yaratdı.
“Bu ilin mart ayında sülh sazişinin mətni tərəflər arasında razılaşdırıldı. Avqust ayında isə ABŞ-da keçirilən görüşdə gələcək sülh haqqında razılaşma əldə olundu. Eyni zamanda, Zəngəzur dəhlizinin açılması ilə bağlı da tərəflər arasında razılaşma var. Bütün bunlar göstərir ki, Azərbaycan və Ermənistan yekun sülh sazişinə kifayət qədər yaxındır.”
O qeyd edib ki, proses Azərbaycanın iradəsi və güclü mövqeyi ilə irəliləyir:
“Azərbaycan torpaqlarını işğaldan azad etdikdən sonra sülh gündəliyini uğurla irəli apardı. Ermənistan isə yaranmış geosiyasi reallıqları dərk edir və sülh sazişini imzalamaqdan başqa çıxış yolu görmür. Bu həm də Ermənistanın inkişafı üçün vacibdir.”
Sabiq deputat əlavə edib ki, Azərbaycanın əsas şərtlərindən biri – ATƏT-in Minsk qrupunun fəaliyyətinin dayandırılması artıq təmin olunub və Ermənistan Konstitusiyasına dəyişiklik edildiyi təqdirdə, yekun sülh sazişinin imzalanmasının qarşısında heç bir maneə qalmayacaq.
Afaq Qurbanzadə
