Hadisə Abşeron rayonu, Xırdalan şəhəri, Heydər Əliyev prospekti, "Kristal Abşeron-1" yaşayış kompleksinin yaxınlığında yerləşən "Karizma" adlı geyim mağazasının qarşısında baş verib.
Xırdalan şəhər sakini, 2008-ci il təvəllüdlü Real Ağayev (soyad şərtidir) gecə saat 2 radələrində mağazanın qarşısında tanışları Ayxan və Nizamini sərxoş vəziyyətdə görüb. O, həmin şəxslərə deyib ki, mağazanın qarşısında oturmasınlar, vətəndaşlar narahat olurlar. Sərxoş vəziyyətdə olan Ayxan ona "get işinlə məşğul ol" deyib. Real Ayxan və Nizamidən siqaret istəyib. Ayxan siqaretinin olmadığını desə də, Nizami ona siqaret verib. Bu isə Ayxana pis təsir edib. Sərxoş vəziyyətdə olan Ayxan Reala hücum edərək onu vurmaq istəyib. Hər iki şəxs əlbəyaxa olublar. Həmin vaxt Real üzərində gəzdirdiyi bıçaqla Ayxana iki zərbə endirib və hadisə yerindən qaçıb.
Yaralı xəstəxanaya çatdırılıb.
Polisin keçirdiyi əməliyyat tədbirləri ilə hadisəni törətməkdə təqsirləndirilən Real Ağayev saxlanılıb.
Faktla bağlı cinayət işi başlanılıb və iş Sumqayıt Ağır Cinayətlər Məhkəməsinə göndərilib.
Məhkəmənin hökmü ilə R.Ağayev 3 il azadlıqdan məhrum edilib. Məhkəmə onun yeniyetmə olduğunu və ilk cinayət törətdiyini nəzərə alaraq, ona Cinayət Məcəlləsinin 70-ci maddəsini tətbiq edərək cəzasını şərti hesab edib.
