“Bir Millət, İki Dövlət: Türk Dünyasında Strateji Güc”

Gencehan Tunayın sözlərinə görə, Türkiyə və Azərbaycan arasında möhkəm strateji tərəfdaşlığın əsasında yüzilliklərə dayanan ortaq tarix və mədəniyyət dayanır. Bu ortaq dəyərlər bu gün daha da güclənib və Türk dünyasının birliyi üçün nümunəvi əməkdaşlıq formatı yaradıb. O, Türkiyənin Qarabağ məsələsindəki prinsipial mövqeyinin bu həmrəyliyin ən aydın göstəricisi olduğunu bildirib. Qarabağın işğaldan azad edilməsi zamanı iki ölkə arasındakı qardaşlığın özünü sahədə açıq şəkildə göstərməsi isə bu birliyin gücünü bir daha sübut edib.
Tunay, Zəngəzur Korridorunun gündəmdə olması ilə bu strateji xəttin yeni mərhələyə yüksəldiyini vurğulayıb. Onun fikrincə, korridorun açılması təkcə iki ölkə arasındakı əlaqələri genişləndirməyəcək, həm də bütün Türk dünyasının iqtisadi, siyasi və mədəni inteqrasiyasını gücləndirəcək.
O qeyd edib ki, Türkiyə–Azərbaycan münasibətlərinin strateji tərəfdaşlıq səviyyəsinə qalxması artıq yalnız ikitərəfli əlaqələr deyil, bütün Türk dünyasının birliyini möhkəmləndirən tarixi bir addımdır. “Bir millət, iki dövlət” prinsipi bu gün həm sahədə, həm diplomatik müstəvidə, həm də regional balansların formalaşmasında müəyyənedici gücə çevrilib.

Bu yaxınlaşmanın Qafqazda sülhün təmin olunması, terror və separatizm risklərinin qarşısının alınması, eləcə də bölgədə təhlükəsizliyin möhkəmləndirilməsində mühüm rol oynadığı vurğulanır. Ortaq siyasi mövqe Türk dünyasında həmrəyliyi, özünəinamı və gələcəyə dair birlik idealını daha da gücləndirir.
Nəticə olaraq, iki ölkə arasındakı dostluq və strateji əməkdaşlıq təkcə Azərbaycan və Türkiyənin deyil, bütövlükdə Türk dünyasının sülh, təhlükəsizlik və inkişaf yolunda atdığı ortaq tarixi addım kimi dəyərləndirilir.

Afaq Qurbanzadə