Missiyaların arxasında kimlər dayanırdı?- Deputat Aİ-nin gizli oyunlarını İFŞA ETDİ

Aİ-nin İrəvanda Azərbaycanla sərhəd delimitasiyası üzrə təşəbbüsü ölkəmizin sülh müqaviləsini hüquqi əsaslarla tez bir zamanda imzalamasına necə təsir göstərə bilər?” – mövzu ilə bağlı Milli Məclisin deputatı Elman Məmmədov Xpress.az-a açıqlama verib.

Deputat bildirib ki, bu il avqust ayında Vaşinqtonda ABŞ Prezidenti Trampın təşəbbüsü ilə keçirilən görüşdən sonra Aİ Azərbaycana qarşı bəzi qərəzli və ədalətsiz mövqelərini bir qədər yumşaldıb. “Əlbəttə, bu o demək deyil ki, onlar tam əl çəkiblər, sadəcə mövqelərində müəyyən dəyişikliklər baş verib. Hamımız yaxşı xatırlayırıq ki, əvvəllər onların təşkil etdiyi missiyalarda problemlər olub və tərkibi aydınlaşdıqca, kimlərin iştirak etdiyi məlum oldu. Bu xoşagəlməz hallar unudulmayacaq,” – deyə Elman Məmmədov vurğulayıb.

O, əlavə edib ki, Avropa İttifaqı və AŞPA uzun illər ərzində Azərbaycana qarşı qərəzli mövqelər sərgiləyiblər. “Buna baxmayaraq, ABŞ Prezidentinin mövqeyi ilə bağlı olaraq, bəlkə də bu qurumlar ədalətli mövqe nümayiş etdirə bilərlər. Ümid edirik ki, bu təşəbbüs müsbət nəticələr gətirəcək və sülh sazişinin imzalanmasına maneə törədən qüvvələr artıq bu prosesə qarışmayacaqlar,” – deyə deputat bildirib.

Elman Məmmədovun sözlərinə görə, Avropa həqiqətən Cənubi Qafqazda dayanıqlı sülh istəyirsə, qərəzli mövqelərdən çəkilməlidir. “ATƏT-in Minsk qrupu da uzun illər Azərbaycana qarşı ədalətsiz və qərəzli mövqe nümayiş etdirib. Əgər Ermənistan rəhbərliyi yenə pozucu fəaliyyətlə məşğul olarsa, Paşinyan mövqeyini düzgün göstərməli olacaq, çünki Vaşinqtonda söz verib və sənəd imzalayıb,” – deputat qeyd edib.

O vurğulayıb ki, sağlam qüvvələr, o cümlədən Avropa İttifaqı, məsələyə obyektiv yanaşmalı, bölgədə dayanıqlı sülhün təmin olunmasına çalışmalıdır. “Sülh sazişinin imzalanması üçün Azərbaycan öz tələblərini və şərtlərini açıqlayıb və onlar artıq qəbul olunub. İndi isə işin ləngiməsi heç kimin xeyrinə deyil,” – deyə Elman Məmmədov əlavə edib.

Afaq Qurbanzadə