Kartdan karta köçürmələr bloklana bilər: YENİ QAYDALAR
2025-ci ildən etibarən Rusiyada bank kartları arasında pul köçürmələri ilə bağlı yenilənmiş tələblər qüvvəyə minəcək. Yeni qaydalar vəsaitlərin hərəkətinə nəzarəti gücləndirmək və maliyyə pozuntularının qarşısını almaq məqsədi daşıyır. Dəyişikliklər yalnız adi vətəndaşlara deyil, həm də sahibkarlara, frilanserlərə, öz-özünə işləyənlərə və onlayn biznes sahiblərinə şamil ediləcək. Qaydaların əsas məqsədi elektron ödənişlərə inamı artırmaq və istifadəçiləri saxta maliyyə sxemlərindən qorumaqdır.
15 000 rubla qədər olan köçürmələr
Bu məbləğdə əməliyyatlar əvvəlki kimi, xüsusi təsdiq olmadan — telefon nömrəsi və ya e-poçt vasitəsilə mümkündür. Lakin banklar artıq eyni hesaba tez-tez daxil olan kiçik köçürmələri diqqətlə izləməlidir. Bu cür hərəkətlər bəzən gəlirləri gizlətmək və ya fırıldaqçılığa işarə edə bilər.
15 000–100 000 rubl arası köçürmələr
Bu əməliyyatlar üçün artıq göndərənin şəxsiyyətinin pasportla təsdiqlənməsi məcburidir. Tələb bütün kateqoriyalarda — adi vətəndaşlardan tutmuş frilanserlərə və onlayn ticarətlə məşğul olanlara qədər — hər kəsə aiddir.
100 000 rubldan yuxarı köçürmələr
Bu halda VÖEN (vergi identifikasiya nömrəsi) və vəsaitin mənbəyini təsdiq edən sənədlər təqdim olunmalıdır. Banklar əməliyyatın qanuniliyini araşdırana qədər belə köçürmələri müvəqqəti dayandırmaq səlahiyyətinə malikdir.
Yeni tələblər kimə şamil olunur?
Qaydalar elektron pul kisələrindən, bank kartlarından, onlayn xidmətlərdən və ticarət platformalarından istifadə edən bütün şəxsləri əhatə edir. Tələb olunan sənədlər təqdim edilməzsə, köçürmə rədd oluna bilər. Xüsusilə peer-to-peer köçürmələri və iri onlayn platformalardakı ödənişlər daha ciddi nəzarətə götürülüb.
Mütəxəssislər istifadəçilərə tez-tez kiçik məbləğlərlə daxil olan ödənişlərdən çəkinməyi və bütün maliyyə əməliyyatlarını təsdiqləyən sənədləri (qəbzlər, fakturalar, müqavilələr) saxlamalarını tövsiyə edir.
Bu dəyişikliklər bazara necə təsir edəcək?
Rusiya Mərkəzi Bankı tənzimləmələrin sərtləşdirilməsini maliyyə fırıldaqları və çirkli pulların yuyulması ilə mübarizə zərurəti ilə izah edir. Gücləndirilmiş nəzarət ödəniş sistemlərinin qeyri-qanuni məqsədlərlə istifadəsinin qarşısını almağa kömək edəcək. Uzunmüddətli perspektivdə isə bu yanaşma maliyyə əməliyyatlarının şəffaflığını artıraraq onlayn ödənişlərin təhlükəsizliyini yüksəltməyi hədəfləyir.
Xpress.az
