Rəqəmsal İqtisadiyyat Strategiyasının qəbulu niyə illərlə uzanır?
Artıq dörd ildir ki, Rəqəmsal İqtisadiyyat Strategiyası müzakirə olunur, lakin hələ də təsdiqlənməyib.
Xpress.az-ın məlumatına görə, bunu Azərbaycan İnternet Forumunun prezidenti Osman Gündüz bildirib.
Bir dəfə bu barədə yazmışdım: adında “rəqəmsal” sözü olan layihələrin qəbulu sanki bir tilsimə düşür — razılaşdırma prosesləri aylarla deyil, illərlə davam edir.
Xatırlayıram ki, Strategiyanın hazırlanması üzrə İşçi Qrupunun ilk iclası təxminən üç il əvvəl keçirilmişdi. Bildiyimə görə, 17 dövlət qurumunun təmsil olunduğu bu qrup sənədin hazırlanması ilə məşğul idi. Strategiyanın qəbulu Prezidentin 22 iyul 2022-ci il tarixli Sərəncamı ilə təsdiqlənmiş “2022–2026-cı illərdə sosial-iqtisadi inkişaf Strategiyası”nın Tədbirlər Planında əksini tapıb.
Lakin artıq dörd ildir ki, sənəd barədə “hazırdır”, “təsdiq mərhələsindədir” kimi məlumatlar verilsə də, o, hələ də qəbul edilməyib. Bu müddət ərzində həm ölkədə, həm də dünyada rəqəmsal sektorda ciddi dəyişikliklər baş verib. Belə sürətli transformasiya dövründə adında “rəqəmsal” sözü olan bir sənədin illərlə uzanması doğru yanaşma hesab oluna bilməz.
Bu gün diqqətimi çəkən bir məqam oldu: İqtisadiyyat nazirinin müavini Sahib Ələkbərov ASAN AI Hub təqdimatında 2026–2029-cu illəri əhatə edən Rəqəmsal İqtisadiyyatın İnkişafı Strategiyasının artıq yekun təsdiq mərhələsində olduğunu bildirdi.
Ümid edirəm ki, ölkədə biznes sektorunda rəqəmsal transformasiyanı sürətləndirməyi hədəfləyən bu sənədin qəbulu yaxın zamanda reallaşacaq.
