Qızıl bazarı partlama nöqtəsində: 2026 üçün kritik proqnoz
“Bu il qızıl kəskin sıçrayış edərək təxminən 4 380 dollara qədər yüksəldi. Lakin bu artımdan sonra qiymət dayanaraq cüzi geri çəkildi, amma ciddi bir eniş baş vermədi. Bunun əsas səbəbi qızılın bahalaşmasını dəstəkləyən fundamental faktorların hələ də qüvvədə qalmasıdır. Bu səbəbdən qızıl nə kəskin geri çəkilir, nə də yeni güclü ralliyə başlayır. O sanki “yatır”, amma “yuxulamayıb” – növbəti mərhələni gözləyir".
Bu fikirləri Xpress.az-a iqtisadçı ekspert Eldəniz Əmirov bildirib.
Bu vəziyyəti belə təsəvvür etmək olar: minalar qurulub, lakin onlar hələ partlamayıb.
Bu “minaların” nədən ibarət olduğuna baxaq:
Çin–ABŞ rəqabəti getdikcə daha da kəskinləşir.
Çin və ABŞ-ın Venesuela üzərində təsir savaşı və bu ölkəyə müdaxilə ehtimalı qalmaqdadır.
Qlobal borc böhranı riskləri artır.
Mərkəzi bankların, xüsusilə Çin, Türkiyə, Rusiya, Hindistan və Yaxın Şərq ölkələrinin rekord həcmdə qızıl alışı davam edir.
Dolların qlobal dəyər itirmə riski yüksəlir, dünya rezerv valyutası kimi rolu zəifləyir.
İtaliyanın Avropa Mərkəzi Bankından öz qızıl ehtiyatlarını geri tələb etməsi Avropada qızıl siyasətinin dəyişəcəyi ehtimalını artırır.
Yəni qızılı hazırkı səviyyələrə qaldıran amillər minaların partlaması deyil, onların bir-birinə çox yaxın məsafədə qurulmasıdır. Risklər artıq qiymətə daxil edilib. Yaxın Şərqdəki proseslər və Rusiya–Ukrayna müharibəsi də minaların qurulmasına şərait yaradıb və bu vəziyyət qızılın indiki qiymətində tam əks olunub.
Əgər bu minaların bir hissəsi zərərsizləşdirilsə, qızıl qiymətində müəyyən eniş ola bilər. Lakin onun ilin əvvəlindəki səviyyəyə qədər düşməsi gözlənilmir. Əksinə, minalardan biri belə partlasa, qızıl qiyməti sürətlə arta bilər. Artımın hara qədər davam edəcəyi isə hansı riskin və ya risklərin reallaşmasından asılı olacaq.
Qısacası, qızıl hazırda gözləmə mərhələsindədir. Minalar yerindədir, sadəcə hansısa hadisənin onları hərəkətə gətirməsi gözlənilir. Lakin 2026-cı ildə bu risklərin tam aradan qaldırılması və ya reallaşması ehtimalı aşağıdır. Böyük ehtimalla 2025-ci ildəki qeyri-müəyyənlik və geosiyasi xaos 2026-cı ildə də davam edəcək. Üstəlik, ABŞ-ın kəskin xarici siyasəti bu qeyri-müəyyənliyi təkcə 2026-da deyil, çox güman ki, 2027-də də uzadacaq.
Investisiya qızılı (zərgərlik deyil) uzunmüddətli investisiya üçün yenə də ən etibarlı alətlərdən biri olaraq qalmağa davam edəcək.
