Süni intellekt necə yarandı? - "Nvidia"nın rəhbəri maraqlı fakatları açıqladı
"Nvidia" şirkətinin baş direktoru Censen Huan 2012-ci ildə aparılan ilk maşın öyrənməsi sınaqlarının adi istehlakçı videokartı - daha dəqiqi, SLI ilə birləşdirilmiş, hər biri 3 GB yaddaşa malik iki "GTX 580" üzərində həyata keçirildiyini bildirib.
Huan bun barədə "Co Rogan" podkastında danışıb.
"Nvidia" rəhbəri deyib ki, elə məhz bu avadanlıqda bütün sənaye üçün dönüş nöqtəsinə çevrilən "AlexNet" modeli işə düşüb.
Toronto Universitetinin tədqiqatçıları Aleks Kriçevski, İlya Sutskever və Cefri Hinton hələ müasir formada neyron şəbəkələrin mövcud olmadığı dövrdə şəkillərin tanınmasını yaxşılaşdırmağın yollarını axtarıb. O vaxta qədər hazırlayıcılar kənarların, bucaqların və teksturaların seçilməsi üçün əl ilə yazılmış alqoritmlərə güvənib. "AlexNet" isə 8 qatdan və təxminən 60 milyon parametrdən ibarət bir model olub və kombinə edilmiş qıvrımlı və dərin neyron şəbəkələri vasitəsilə müstəqil şəkildə öyrənə bilib. Nəticə o qədər təsirli olub ki, model kompüter görməsi sahəsindəki aparıcı həlli 70 faizdən çox üstələyib.
Huanın sözlərinə görə, "AlexNet" iki "GTX 580" üçün optimallaşdırılıb və GPU-lar arasında məlumat mübadiləsi yalnız zəruri hallarda baş verib ki, bu da öyrətmə müddətini xeyli qısaldıb.
Həmin illərdə "Nvidia" demək olar ki, süni intellekt texnologiyaları ilə məşğul olmurdu: şirkətin diqqəti 3D qrafika, oyun sənayesi və "CUDA" nüvələrinin inkişafına yönəlmişdi. "GTX 580" oyunlar üçün yaradılmışdı və neyron şəbəkələri sürətləndirəcək xüsusi texnologiyalara sahib deyildi, lakin onun paralel arxitekturası bu tip tapşırıqlar üçün ideal olmuşdu.
Huanın sözlərinə görə, "AlexNet"in uğuru "Nvidia"nı strategiyasını tam dəyişməyə və 2012-ci ildə maşın öyrənməsi texnologiyalarına sərmayə qoymağa məcbur edib. Nəticədə DGX qurğuları (onlardan biri İlon Maska hədiyyə edilib), ilk tenzor nüvələrini təqdim edən "Volta" arxitekturası və "DLSS" kimi texnologiyalar meydana çıxıb.
