Qeyri-neft sektoru artımı iqtisadi artımı 2 dəfə üstələyə bilər - DEPUTATIN PROQNOZU

Müxtəlif beynəlxalq maliyyə qurumları və reytinq agentlikləri 2025–2028-ci illər üçün Azərbaycanın ÜDM artımını orta hesabla 2–3 % səviyyəsində proqnozlaşdırır. Proqnozlar iqtisadiyyatın real potensialını əks etdirirmi və neft-qaz sektorundan asılılığın azaldılması qeyri-neft sektorunun inkişafına hansı dərəcədə təsir göstərə bilər? Mövzu ilə bağlı Milli Məclisin deputatı Tahir Mirkişili xpress.az-a açıqlama verib.

"Növbəti illərdə qlobal iqtisadi artımın 2,4–3,1 % olacağı proqnozlaşdırılır. Azərbaycanda da növbəti illərdə ümumi iqtisadi artımın 3 % ətrafında olması ilə bağlı verilən proqnozlar qlobal trendlə uyğundur. Amma iqtisadiyyatın 75 %-ni təşkil edən qeyri-neft sektorunda iqtisadi artımın 5–6 % ətrafında olacağı gözləntiləri xüsusi əhəmiyyət kəsb edir.

Növbəti illərdə iqtisadi artım ancaq qeyri-neft sektoru hesabına təmin ediləcək. Bu konteksdə qeyri-neft-qaz sektorunda iqtisadi artımın ümumi iqtisadi artım tempinin iki dəfə üstələməsi təqdirəlayiq haldır. Nəzərə alsaq ki, növbəti illərdə qeyri-neft-qaz sektoru iqtisadiyyatın 80 %-ni təşkil edəcək, bu sektorun inkişafı, burada aparılan islahatlar və baş verən keyfiyyət dəyişikləri xüsusi əhəmiyyət kəsb edir."

Afaq Qurbanzadə 

Xpress.az