3,5 milyard manatlıq qərar: 2026-cı ildə bölgələrdə nə dəyişəcək?
2025-ci ilin sonuna yaxın iqtisadi siyasət regionlarda məşğulluğun artırılması və əhalinin sosial rifahının yaxşılaşdırılması baxımından əhəmiyyətli nəticələr verib. Xpress.az-a açıqlamasında Millət vəkili Vüqar Bayramov bildirib ki, regionların inkişafı iqtisadi siyasətin əsas prioritetlərindən biridir. Bu kontekstdə mütəmadi olaraq regionlarda həm infrastrukturun daha da inkişaf etdirilməsi və yenilənməsi, həm də investisiyaların cəlb olunması ilə bağlı müxtəlif layihələrin icrasını müşahidə edirik. Bu isə bölgələrdə, xüsusən ixtisaslı kadrların işlə təmin olunması baxımından vacibdir.
Azərbaycan üçün iqtisadiyyatın balanslı inkişafı əsas hədəflərdən olduğuna görə, regionların inkişafı da prioritetliyini qoruyub saxlayır. 2025-ci ildə yalnız Qarabağ və Şərqi Zəngəzur deyil, həmçinin digər bölgələrdə də yeni müəssisələrin açılması və infrastrukturun genişlənməsi müşahidə olunub. Xüsusilə diqqətəlayiqdir ki, hazırda işğaldan azad olunmuş ərazilərdə yaşayan vətəndaşların sayı 65 mindən çoxdur və onların böyük əksəriyyəti məhz həmin bölgələrdə işlə təmin olunub. Beləliklə, bölgələrin inkişafı və məşğulluğun təmin edilməsi istiqamətində işlər 2025-ci ildə də davam etdirilib.
2026-cı ildə də regionların inkişafı prioritet olaraq qalacaq. Yeni müəssisələrin açılması, xüsusən nəqliyyat və logistika sahələrinin inkişafı ilə bağlı fəaliyyətlərin genişləndirilməsi gözlənilir. Qarabağ və Şərqi Zəngəzurun bərpasına 3,5 milyard manat vəsait ayrılacaq. Bununla da zəfərdən sonra işğaldan azad olunmuş ərazilərin bərpası və yenidən qurulmasına ayrılan vəsaitin ümumi həcmi 26 milyard manatı keçəcək. Bütün bunlar göstərir ki, 2026-cı ildə bölgələrin inkişafı və rayonlarda məşğulluğun təmin edilməsi ilə bağlı işlər genişlənəcək.
Afaq Qurbanzadə, Xpress.az
