“Ekoetika” verilişinin növbəti buraxılışı palçıq vulkanlarına həsr olunub - VİDEO

Azərbaycan Televiziyasında (AzTV) yayımlanan “Ekoetika” verilişinin növbəti buraxılışı palçıq vulkanlarına həsr olunub.

Xpress.az xəbər verir ki, layihənin müəllifi və aparıcısı, jurnalist Orxan Cabbarlı ölkəmizdə palçıq vulkanlarının sayı barədə məlumat verib. Bildirilib ki, ölkəmizdə 350-dən artıq palçıq vulkanı mövcuddur. Bu vulkanlar əsasən Abşeron və Qobustan rayonlarının ərazisində, eyni zamanda Xəzər dənizi akvatoriyasında yayılıb. Palçıq vulkanlarının əhəmiyyəti nəzərə alınaraq, 2007-ci ildə Azərbaycan Prezidentinin müvafiq sərəncamı ilə Palçıq vulkanları qrupu Dövlət Təbiət Qoruğu yaradılıb.

Verilişdə təbiətin möcüzəsi sayılan palçıq vulkanlarına ekotur təşkil olunub. Elm və Təhsil Nazirliyinin Geologiya və Geofizika İnstitutunun baş elmi işçisi Orxan Abbasov, Palçıq vulkanları qrupu Dövlət Təbiət Qoruğunun direktoru Ceyhun Paşayev vulkanların yaranma səbəblərindən, ekoturizm imkanlarından danışıb.

Ekotur çərçivəsində Palçıq Vulkanları Turizm Kompleksi barədə də tamaşaçılara məlumat verilib. Qeyd olunub ki, 13 iyun 2024-cü ildə Prezident İlham Əliyevin iştirakı ilə açılışı olan bu Kompleks palçıq vulkanlarını yaxından tanımaq və izləmək imkanı yaradan müasir turizm məkanıdır. Kompleks Qobustan ərazisində dəniz səviyyəsindən 235 metr yüksəklikdə yerləşir. Ötən müddət ərzində Kompleks yerli və xarici turistlərin mütəmadi ziyarət etdiyi məkanlardan birinə çevrilib.

Kompleksin bələdçisi Samir İbrahimov jurnalist O.Cabbarlıya və tamaşaçılara turizm obyektinin ərazisində nümayiş olunan palçıq vulkanları, o cümlədən “Qılınc” palçıq vulkanı, bu vulkanların xüsusiyyətləri barədə məlumat verib. Palçıq Vulkanları Turizm Kompleksindəki Minerallar və qiymətli daşlar sərgisi, Rəsm qalereyası, Təbiət tarixi sərgisi verilişin aparıcısında zəngin təəssürat yaradıb.

Daha ətraflı videosüjetdə: