100 milyon dollar bir ölkəni necə dəyişdirə bilər? Professor açıqladı

“Son 80-100 ildə ümumdaxili məhsulun artımı və iqtisadi inkişaf əsasən investisiyalar hesabına təmin olunur”.
Bu sözləri Xpress.az-a açıqlamasında iqtisad elmləri doktoru, professor Rüfət Quliyev deyib.
Onun sözlərinə görə, investisiyaların iqtisadi artıma təsiri ölkənin iqtisadi potensialından asılıdır:
“Misal üçün, 100 milyon dollarlıq investisiya bəzi ölkələrdə ÜDM-in 1-1,5 faiz artmasına təkan verə bilər. Lakin Çin kimi ölkədə  bu məbləğin təsiri hiss olunmur, çünki orada milyardlarla dollar investisiyaya ehtiyac var.
Azərbaycanda ən böyük layihələr əsasən dövlət tərəfindən həyata keçirilir. Xarici investisiyalar olsa da, dövlət dəstəyi mühüm rol oynayır. Ümumilikdə, ölkəyə nə qədər çox investisiya cəlb olunarsa, ÜDM-in artım imkanları da bir o qədər yüksələr.
Qeyri-neft sektoruna təsirə gəldikdə isə, investisiyanın nəticəsi onun yönəldildiyi sahədən asılıdır. Kənd təsərrüfatına yatırılan vəsait ərzaq təhlükəsizliyini təmin etsə də, iqtisadi artıma təsiri nisbətən məhdud olur. Tikinti materialları istehsalı və tikinti sektoruna qoyulan investisiyalar isə daha sürətli və geniş iqtisadi effekt yarada bilir.
Ümumiyyətlə, iqtisadi artım dövrlərində ilk canlanma tikinti sektorunda müşahidə olunur, geriləmə zamanı isə ilk təsirlənən sahələrdən biri yenə tikinti sektoru olur. Bu tendensiya əksər ölkələr üçün xarakterikdir”,-deyə Rüfət Quliyev fikirini  tamamladı.

Afaq Qurbanzadə