Şəxsiyyət vəsiqəsindəki qan qrupu – Nə qədər etibarlıdır?

Tibbdə bir çox proseslər kimi qan köçürülməsi də həyat qurtaran prosedurdur. Bu proses zamanı donor və qan alan şəxsin qan qruplarının uyğunluğu son dərəcə vacibdir. Bəzən insanların şəxsiyyət vəsiqələrində qan qrupu haqqında məlumat qeyd olunur və təcili hallarda bu məlumatdan istifadə olunmaq istəyi yaranır.
 

Nəzərə almaq lazımdır ki, şəxsiyyət vəsiqəsindəki qan qrupu məlumatı düzgün yazılmaya, qeydiyyat zamanı texniki səhvlər baş verə bilər. Belə hallarda yanlış qan köçürülməsi ciddi sağlamlıq problemlərinə, hətta ölümcül fəsadlara səbəb ola bilər.

Tibb müəssisələrində qan köçürülməsindən əvvəl xəstədən və donordan qan nümunəsi götürülür və laboratoriyada qan qrupu müəyyən edilir. Bundan əlavə, donor və resipiyentin qanları arasında uyğunluq testi aparılır. Bu tədbirlər mümkün riskləri minimuma endirmək məqsədi daşıyır.

Bəs şəxsiyyət vəsiqəsindəki qan qrupuna qan köçürülməsi zamanı nə qədər etibar etmək olar və yaxud hansı hallarda etibar etmək olar?

Mövzu ilə bağlı Bizim.Media-ya danışan tibb sahəsi üzrə mütəxəssis, həkim Rasif Bağırov deyib ki, şəxsiyyət vəsiqəsindəki qan qrupu məlumatı yalnız fövqəladə vəziyyətlərdə həkimlər üçün əlavə informasiya kimi faydalı ola bilər:

“Xəstələrə qan köçürərəkən şəxsiyyət vəsiqəsindəki qan qrupu məlumatı qan verən şəxsin (donor) qan qrupunu yoxlamaq imkanı olmadığı halda faydalı ola bilər. O halda istifadə edib, qan köçürə bilərlər. Hərbi səhra şəraitində belə şeylər eləmək olar. Amma qan analizinin aparılması mümkün olan yerlərdə şəxsiyyət vəsiqəsinə baxıb qan köçürmək olmaz. Belə yerlərdə qan yenidən yoxlanılıb, dəqiqləşdirilib, ondan sonra köçürülməlidir”.