Türkiyəli nazir Zəngəzur dəhlizinin açılacağı vaxtı AÇIQLADI

Türkiyənin nəqliyyat və infrastruktur naziri Abdulkadir Uraloğlu COP31 tədbiri çərçivəsində Zəngəzur dəhlizinin tikintisi və istifadəyə veriləcəyi müddətlə bağlı açıqlama verib.

Xpress.az-ın xəbərinə görə, nazir bildirib ki, layihə başa çatdıqdan sonra Azərbaycanla Türkiyə arasında Türk dünyasına birləşən daha qısa və yüksək standartlara malik dəmir yolu və avtomobil yolu istifadəyə veriləcək.

Uraloğlunun sözlərinə görə, Zəngəzur dəhlizi regionda yükdaşımaların həcminə ciddi töhfə verəcək və gələcəkdə nəqliyyat tutumu ilə bağlı problem aradan qalxacaq.

O qeyd edib ki, dəhliz vasitəsilə ildə 10 milyon tondan artıq, hətta 30 milyon tona qədər yük daşımaq mümkün olacaq.

Layihənin nə zaman tamamlanacağı ilə bağlı suala cavab verən nazir Türkiyə ərazisində tikinti işlərinə artıq başlanıldığını bildirib. Onun sözlərinə görə, Kars–Iğdır–Aralık–Dilucu istiqamətində dəmir yolu xətti inşa edilir. Azərbaycan tərəfi də Ermənistan istiqamətində irəliləyir.

Uraloğlu Ermənistan ərazisində yerləşən 45 kilometrlik hissədə isə hələ tikintiyə başlanılmadığını diqqətə çatdırıb. O, layihənin tamamlanması üçün dörd ilin yaxşı müddət olduğunu vurğulayıb.

Türkiyəli nazir Azərbaycanla digər nəqliyyat layihələrindən də danışıb. Bildirib ki, iki ölkə arasında aviasiya və avtomobil nəqliyyatı davam edir, Bakı–Tbilisi–Qars dəmir yolu xətti də fəaliyyət göstərir.

Uraloğlu vurğulayıb ki, Zəngəzur dəhlizinin açılması ilə iki ölkə arasında nəqliyyat əlaqələri sahəsində mövcud problemlərin böyük hissəsi həllini tapacaq.

O, Zəngəzur dəhlizinin həm Azərbaycan, həm Türkiyə, həm də bütövlükdə region üçün mühüm əhəmiyyət daşıdığını qeyd edib.

Xpress.az