Azərbaycanın danışıqlar komandası COP31-də fəal işləyir - Nigar Arpadaraidən AÇIQLAMA

Antalyada keçirilən BMT-nin İqlim Dəyişikliyi üzrə Çərçivə Konvensiyasının 31-ci Tərəflər Konfransı (COP31) çərçivəsində Azərbaycan nümayəndə heyəti də fəal iştirak edir.

Xpress.az-ın Antalyaya ezam olunmuş əməkdaşı xəbər verir ki, COP29-un iqlim üzrə yüksəksəviyyəli çempionu, Milli Məclisin deputatı Nigar Arpadarai Xpress.az-a müsahibəsində COP31-in əhəmiyyəti, Azərbaycanın beynəlxalq iqlim əməkdaşlığındakı rolu və Türkiyəyə dəstəyi barədə danışıb.

Deputat bildirib ki, Azərbaycan 2024-cü ildə Bakıda keçirilən COP29 zamanı əldə olunan mühüm nəticələri və başladığı təşəbbüsləri davam etdirir. Onun sözlərinə görə, Azərbaycan nümayəndə heyəti qardaş Türkiyənin ev sahibliyi etdiyi COP31-də həmrəylik nümayiş etdirmək və prosesə töhfə vermək məqsədilə iştirak edir.

Nigar Arpadarai qeyd edib ki, Azərbaycanın danışıqlar komandası konfrans çərçivəsində fəal işləyir, tərəflər arasında dialoqun qurulmasına və mövqelərin yaxınlaşdırılmasına kömək göstərir.

Deputat Azərbaycan pavilyonuna da böyük maraq olduğunu vurğulayıb. Bildirib ki, pavilyonda tematik günlərə uyğun müxtəlif tədbirlər təşkil olunur, dövlət qurumları və özəl sektor nümayəndələri də proqramda iştirak edirlər.

Onun sözlərinə görə, əsas məqsəd COP31-in uğurla başa çatmasıdır. Bu, təkcə Türkiyənin deyil, bütövlükdə beynəlxalq ictimaiyyətin və qlobal iqlim gündəliyinin maraqlarına xidmət edir.

“Azərbaycanla Türkiyə həmişə yan-yanadır, həmişə yanaşıdırlar. Biz də Azərbaycan nümayəndə heyəti olaraq Türkiyəni dəstəkləmək üçün buradayıq. Əsas məqsəd COP-un uğurudur. Bu, həm Türkiyənin uğurudur, həm də qlobal dünya üçün vacib məsələdir”, – deyə Nigar Arpadarai bildirib.

Deputat Azərbaycan və Türkiyə arasında mövcud həmrəyliyin beynəlxalq platformalarda da özünü göstərdiyini diqqətə çatdırıb.

Xpress.az