DİM-in saytı ÇÖKDÜ, QEYDİYYAT VAXTI DƏYİŞDİRİLDİ - FOTO
Dövlət İmtahan Mərkəzi (DİM) tərəfindən dövlət qulluğu vəzifələri üzrə test imtahanında iştirak etmək üçün onlayn qeydiyyat bu gün – 11.06.2026-cı il saat 11:00-dan etibarən aktiv olub.
Xpress.az xəbər verir ki, dim.gov.az saytında “Dövlət qulluğu”, “Dövlət qulluğu vəzifələri üzrə (A və B növü) imtahanda iştirak etmək üçün qeydiyyat” bölməsini seçib açılan pəncərədə qeydiyyatdan keçənlərin və boş qalan yerlərin sayını müşahidə etmək olub. Lakin vəzifə qrupları üzrə seçim edib qeydiyyat etmək istəyərkən saytda “donmalar” müşahidə olunub, serverin aktiv olmadığı ekranda görünüb.
Bir neçə dəqiqədən sonra isə DİM-in saytı tamamilə çöküb, ümumiyyətlə sayta giriş etmək mümkün olmayıb. Xeyli vaxt keçdikdən sonra sayt açılanda məlum olub ki, artıq Bakıda BB qrupu imtahanı üçün 134, Naxçıvanda BA və BB qrupları üçün 24, Bakıda BA qrupu üçün 105, Gəncədə BA və BB qrupu üçün 19, Gəncədə AB və AC qrupları üçün 13, Bakıda AB və AC qrupları üçün 213, Naxçıvanda AB və AC qrupları üçün 5 nəfər qeydiyyatdan keçə bilib.
Günorta saatlarına doğru isə saytda bu istiqamət üzrə əməliyyat tamamən dayandırılıb və elan yerləşdirilib ki, imtahanlarda qeydiyyat vaxtı 16.06.2026 tarixində saat 11:00-a dəyişdirilib.
Göründüyü kimi, DİM dövlət qulluğu vəzifələri üzrə test imtahanında iştirak etmək üçün onlayn qeydiyyatı nümunəvi təşkil edə bilməyib.
Zərbəçi
