Milli Qurtuluş Günü: Müstəqil Azərbaycanın İnkişaf Yolunun Başlanğıcı
15 İyun ölkəmizdə Azərbaycan xalqının müasir tarixində mühüm siyasi və tarixi əhəmiyyətə malik olan Milli Qurtuluş Günü kimi qeyd edilir. Bu əlamətdar gün dövlət müstəqilliyimizin qorunması, ictimai-siyasi sabitliyin bərpası və dövlətçilik ənənələrimizin möhkəmləndirilməsi baxımından xüsusi önəm daşıyır. Milli Qurtuluş Günü Azərbaycan xalqının Ümummilli Lideri Heydər Əliyevin hakimiyyətə qayıdışı ilə bağlı tarixi dönüş nöqtəsidir.
1991-ci ildə dövlət müstəqilliyini bərpa etdikdən sonra Azərbaycan mürəkkəb siyasi proseslər, iqtisadi çətinliklər və daxili qarşıdurmalarla üzləşmişdi. Xüsusilə 1993-cü ilin iyun hadisələri ölkəni vətəndaş qarşıdurması və dövlət müstəqilliyinin itirilməsi təhlükəsi ilə qarşı-qarşıya qoymuşdu. Respublikada həyatın bütün sahələrini dərin böhran bürümüş, dövlət idarəçiliyi zəifləmişdi.
Belə bir ağır şəraitdə xalqın tələbi ilə Heydər Əliyev Bakıya qayıdaraq ölkənin siyasi rəhbərliyində təmsil olundu və 15 iyun 1993-cü ildə Azərbaycan Respublikası Ali Sovetinin sədri seçildi. Bu hadisə ölkədə sabitliyin bərpası, vətəndaş qarşıdurmasının qarşısının alınması və dövlət idarəçiliyinin möhkəmləndirilməsi istiqamətində dönüş nöqtəsi oldu.
Ümummilli Liderin zəngin siyasi təcrübəsi, uzaqgörən dövlətçilik baxışı və qətiyyətli fəaliyyəti nəticəsində qısa müddətdə ölkədə sabitlik təmin edildi, qanunçuluq və ictimai asayiş bərpa olundu, dövlət institutlarının fəaliyyəti gücləndirildi. Həmin dövrdən etibarən Azərbaycan dövlətçiliyinin möhkəmləndirilməsi istiqamətində ardıcıl və məqsədyönlü tədbirlər həyata keçirilməyə başlandı.
Heydər Əliyevin rəhbərliyi ilə hüquqi və demokratik dövlət quruculuğu sahəsində mühüm islahatlar həyata keçirildi, milli ordu quruculuğuna xüsusi diqqət yetirildi, iqtisadi inkişaf strategiyasının əsasları formalaşdırıldı və Azərbaycanın beynəlxalq mövqelərinin möhkəmləndirilməsi istiqamətində əhəmiyyətli addımlar atıldı. Sonrakı illərdə yeni Konstitusiyanın qəbul olunması, çoxpartiyalı siyasi sistemin inkişafı və bazar iqtisadiyyatına keçid bu siyasətin uğurlu nəticələri kimi tarixə düşdü.
1993–2003-cü illər Azərbaycanın müasir inkişaf tarixində mühüm mərhələ kimi qiymətləndirilir. Həmin illərdə həyata keçirilən islahatlar ölkənin davamlı inkişafının təməlini formalaşdırdı. 1994-cü ildə imzalanan “Əsrin müqaviləsi” Azərbaycanın iqtisadi inkişafında yeni mərhələnin başlanğıcı oldu, ölkənin dünya iqtisadi sisteminə inteqrasiyasını sürətləndirdi və beynəlxalq əməkdaşlıq imkanlarını genişləndirdi.
Milli Qurtuluşdan sonra dövlət quruculuğu prosesi daha da sürətləndi, demokratik institutların formalaşdırılması istiqamətində mühüm addımlar atıldı. Nəticədə Azərbaycan regionun aparıcı dövlətlərindən birinə çevrilərək beynəlxalq təşkilatlarda öz mövqeyini əhəmiyyətli dərəcədə gücləndirdi.
Bu gün Prezident İlham Əliyev tərəfindən Ümummilli Lider Heydər Əliyevin siyasi kursu uğurla davam etdirilir və yeni dövrün çağırışlarına uyğun şəkildə zənginləşdirilir. Həyata keçirilən məqsədyönlü siyasət nəticəsində Azərbaycan dinamik inkişaf edən, müasirləşən və beynəlxalq nüfuzu durmadan artan güclü dövlətə çevrilmişdir. Ölkəmiz milli maraqların qorunması, sosial-iqtisadi inkişafın təmin olunması və beynəlxalq arenada mövqelərinin daha da möhkəmləndirilməsi istiqamətində mühüm uğurlar əldə edir.
Milli Qurtuluş Günü Azərbaycanın müstəqil dövlət kimi inkişaf yoluna çıxmasının, milli həmrəyliyin möhkəmlənməsinin və gələcək tərəqqinin əsasını qoyan mühüm tarixi mərhələdir. Sonrakı dövrlərdə həyata keçirilən siyasi, iqtisadi və hüquqi islahatlar ölkənin inkişafına, dövlət institutlarının güclənməsinə və beynəlxalq nüfuzunun artmasına geniş imkanlar yaratmışdır.
Azərbaycan Respublikası Milli Məclisinin qərarı ilə 15 İyun tarixi rəsmi olaraq Milli Qurtuluş Günü elan edilmiş və hər il ölkə miqyasında təntənə ilə qeyd olunur. Bu əlamətdar gün dövlətçiliyimizin möhkəmləndirilməsi, milli birlik və həmrəylik dəyərlərinin təbliği baxımından mühüm əhəmiyyət daşıyır.
Milli Qurtuluş Günü münasibətilə Azərbaycan xalqını səmimi qəlbdən təbrik edir, ölkəmizə davamlı inkişaf, əmin-amanlıq, rifah və yeni uğurlar arzulayırıq. Bu tarixi gün dövlət müstəqilliyimizin, milli birliyimizin və güclü dövlətçilik ənənələrimizin əhəmiyyətini bir daha xatırladır, gələcək nəsillərə ötürülməsinə xidmət edir.
Pərvanə Vəliyeva
Milli Məclisin deputatı
