22-28 iyun tarixlərində maqnit fırtınası gözlənilmir – ALİMLƏR AÇIQLADI
22-28 iyun 2026-cı il tarixləri üçün yayımlanan kosmik hava proqnozuna əsasən, Yer kürəsində maqnit fırtınalarının baş verməsi gözlənilmir.
Xpress.az xəbər verir ki, məlumat Rusiya Elmlər Akademiyasının Günəş Astronomiyası Laboratoriyası tərəfindən açıqlanıb.
Mütəxəssislərin bildirdiyinə görə, ötən həftəsonu da geomaqnit vəziyyət sabit olub və hər hansı maqnit fırtınası qeydə alınmayıb. Laboratoriyanın ilkin proqnozlarına əsasən, hətta iyul ayının sonunadək də ciddi geomaqnit pozuntuları gözlənilmir.
Alimlər qeyd edirlər ki, son günlərdə müşahidə olunan yüksək temperatur və güclü günəş şüalanması Günəş aktivliyinin artması ilə əlaqəli deyil. Onların sözlərinə görə, ultrabənövşəyi indeksdəki dəyişikliklər əsasən atmosfer şəraitindən asılıdır və maqnit fırtınaları ilə birbaşa bağlı deyil.
Maqnit fırtınaları Günəşdən kosmosa atılan ionlaşmış plazma axınlarının Yerin maqnit sahəsi ilə qarşılıqlı təsiri nəticəsində yaranır. Bu zaman planetin maqnit sahəsində müəyyən dəyişikliklər baş verir və geomaqnit aktivlik artır.
Mütəxəssislər bildirirlər ki, hazırda Günəşdə nisbi sakitlik hökm sürür. Bu səbəbdən yaxın günlərdə maqnit fırtınalarının baş verməsi ehtimalı çox aşağı qiymətləndirilir.
Alimlər eyni zamanda xatırladıblar ki, yay mövsümündə əsas diqqət günvurma, yüksək temperatur və ultrabənövşəyi şüalanmanın təsirlərindən qorunmağa yönəldilməlidir. Onların fikrincə, sağlam həyat tərzi və güclü immun sistemi insanların geomaqnit dəyişikliklərinə həssaslığını da azalda bilər.
Qeyd edək ki, iyunun 21-də Şimal yarımkürəsində yay gündönümü baş verib. Bu tarixdən etibarən günlərin uzunluğu tədricən azalmağa başlayır və astronomik təqvimə görə yay mövsümü davam edir.
