Avtomobil qəzasında həlak olan 24 yaşlı Məryəm Məmədova altı nəfərə həyat bəxş etdi

Bakıda baş verən ağır yol-nəqliyyat hadisəsi nəticəsində həyatını itirən 24 yaşlı Məryəm Məmədova orqan donoru olaraq altı nəfərin həyatını xilas edib.

Hadisə iyunun 12-də saat 21:00 radələrində paytaxtın Babək prospektində qeydə alınıb. İlkin məlumata görə, "Iveco" markalı avtobusla "Chery" markalı minik avtomobili toqquşub. Qəza zamanı avtomobildə sərnişin olan Məryəm Məmədova ağır xəsarətlər alıb.

Həkimlər onun həyatını xilas etmək üçün üç gün mübarizə aparsalar da, səylər nəticə verməyib. Məryəm Məmədova iyunun 15-də xəstəxanada vəfat edib.

Mərhumun qohumu Nicat Əliyevin sözlərinə görə, qəza nəticəsində Məryəm ağır kəllə-beyin travması alıb və xəstəxanada onun beyin ölümü qeydə alınıb.

Məryəm Məmədova doğulduğu Gəncə şəhərində torpağa tapşırılıb. Dəfn mərasimindən sonra ailəsi onun orqanlarının bağışlandığını açıqlayıb. Bildirilib ki, mərhumun ürəyi və digər orqanları transplantasiya gözləyən ağır xəstələrə köçürülüb.

Ailə üzvlərinin sözlərinə görə, bu qərarı vermək onlar üçün olduqca çətin olsa da, Məryəm sağlığında ehtiyac yaranacağı təqdirdə orqanlarının digər insanlara bağışlanmasını istədiyini bildirib.

Qeyd edək ki, Məryəm Məmədova tanınmış bloqçu Nərmin Əliyevanın bacısıdır. Nərmin Əliyeva sosial şəbəkə hesabında paylaşdığı yazıda bacısının xeyirxahlığını və insanlara yardım etməyi sevən bir şəxs olduğunu vurğulayaraq onun xatirəsini yad edib.

Məryəmin orqan donoru olması nəticəsində altı nəfər yeni həyat şansı qazanıb.

Xpress.az