Bankların 3-cü tərəf dedikləri kimdir? -MÜƏMMA
“Bu gün ölkənin bank sektorunda kütləvi texniki nasazlıq yaşandı. Azərbaycan Beynəlxalq Bankı (ABB), ExpressBank və AccessBank-ın kart əməliyyatlarında, eləcə də Yelo Bank-ın mobil tətbiqində ciddi çətinliklər qeydə alındı. Nasazlıq nəticəsində vətəndaşların kart balanslarından əlavə və ya təkrarlanan vəsaitlər silindi. Banklar dərhal mobil tətbiqlər vasitəsilə bildiriş göndərərək məsələnin "üçüncü tərəfdən" qaynaqlandığını bəyan etdilər”.
Xpress.az xəbər verir ki, bunu Azərbaycan İnformasiya və Kommunikasiya Texnologiyaları Sənayesi Assosiasiyası İctimai Birliyinin sədri Elvin Abbasov deyib.
O, prosessinq mərkəzi olan Azəricard MMC rəsmi açıqlama yayaraq problemin birbaşa onlardan qaynaqlanmadığını bildirdi:
" Xətanın banklararası hesablaşma fayllarının emalı (klirinq prosesi) zamanı yaranan dublikat əməliyyatlarla bağlı olduğu qeyd edildi.
İndi gələk məsələnin paradoksal tərəfinə:
Azəricardın yaydığı məlumata əsaslansaq, problem banklardadır. ABB-nin yaydığı məlumata əsaslansaq isə, problem sirli "üçüncü tərəfdədir". Əgər Azəricardda problem yoxdursa, deməli, eyni prosessinq mərkəzindən istifadə edən fərqli banklar eyni gündə, eyni anda və eyni saniyədə möcüzəvi şəkildə tamamilə eyni xətanı törədiblər.
Bankların günahlandırdığı o "üçüncü tərəf" isə mənim üçün hələ də sirr olaraq qalır. Bu naməlum tərəf ya qlobal ödəniş sistemləridir (Visa və ya MasterCard), ya da ki... yəqin yenə günahkar bankın öz müştərisidir. Çünki görünən odur ki, ortada başqa bir "tərəf" tapmaq mümkün deyil.
Hazırda əməliyyatların ləğv edildiyi və balansların bərpa olunduğu bildirilsə də, bu rəqəmsal məsuliyyətsizliyin real müəllifinin kim olduğu sualı açıq qalır".
