Müəllimin ən böyük müəllimi

Bəzən müəllimin ən böyük müəllimi elə tələbəsi olur..

İllər əvvəl dövlət qulluğuna hazırlıq üçün bir qrup yaratmışdım. Qrup bir az ərköyün idi. Bir nəfərdən başqa hamısı işlədiyi üçün dərsə gecikir, bəzən isə ümumiyyətlə gəlmirdi. Tapşırıqlar da çox vaxt yerinə yetirilmirdi. Mən isə heç kimin geri qalmamasını düşündüyüm üçün dərsləri planlaşdırdığım tempdə davam etdirə bilmirdim..

Bir gün yenə hazırlıqsız gəldiklərinə görə yeni mövzu keçmədim. Hamı getdikdən sonra bir xanım tələbə qaldı, emosional və kövrək şəkildə dedi: "Müəllim, mən sizin dərsiniz üçün çox uzaqdan gəlirəm.. Siz bilmirsiniz hansı mübarizələrdən keçib bura çatıram. .Hamıya eyni davranmağınız bəzən mənim kimilərə qarşı ədalətsizlik olur.."

Həmin gün bu qızın sözlərini çox düşündüm, başa düşdüm ki, bərabərlik hər kəsə eyni davranmaqdır, hər kəsin uğurlu olmasını istəməkdirsə, ədalət isə hər kəsin görünməyən yükünü nəzərə almaqdır..

Sonradan öyrəndim ki, onun təkcə yolu uzaq deyilmiş. Başqa ailəvi problemləri var imiş..

Onunla ayrıca məşğul oldum, qəbulda çox yüksək nəticə əldə etdi və bir il sonra isə çoxlarının inanmadığı bir nəticəyə artıq nail olmuşdu, nazirliklərdən birində dövlət qulluğuna təyinat almış, sevincini bölüşmüşdü..

O gün müəllim kimi mən də bir dərs öyrəndim: Biz çox vaxt insanların davranışını görürük, amma həmin davranışın arxasında gizlənən mübarizəni görmürük. Kimi yorğunluqla, kimi yoxsulluqla, kimi ailə problemləri ilə, kimi isə səssiz qırılmış ümidlərlə yaşayır..

Əsl ədalət isə hamını eyni sıraya düzmək deyil, hər kəsə daşıdığı yük qədər anlayış göstərə bilməkdir.

Surət MEHDİYEV