Naxçıvanda kadr islahatı adı altında “EKSPERİMENTLƏR”: Artıq vəziyyət elə həddə çatıb ki... - FOTO
“Naxçıvan Səlahiyyətli Nümayəndəliyindən ayrılan bir neçə əməkdaş öz sahəsində təcrübəli və peşəkar kadrlar idi. Lakin elə bir mühit yaradıldı ki, onlar işlərindən ayrılmağa məcbur oldular. Halbuki Prezident İlham Əliyevin həyata keçirdiyi siyasətin əsas məqsədlərindən biri peşəkar kadrların qorunması və vətəndaş məmnuniyyətinin təmin edilməsidir. Təəssüf ki, Naxçıvanda "kadr islahatı" adı altında peşəkar kadrların itirilməsi ciddi narahatlıq doğurur”.
Xpress.az xəbər verir ki, bu barədə jurnalist Sara Əzimova sosial media hesabında paylaşım edib.
O qeyd edib ki, bu gün Naxçıvanda müşahidə olunan əsas problemlərdən biri, heç şübhəsiz, “kadr islahatları” adı altında həyata keçirilən qəribə eksperimentlər və işsizlikdir: “Artıq vəziyyət elə həddə çatıb ki, insanlar iqtisadi və sosial çətinliklərdən daha çox, qohum-əqrəbanın, dost-tanışın “uğurlu karyera sıçrayışlarını” müzakirə edirlər. Belə görünür ki, təcrübə, peşəkarlıq və bacarıq köhnə dəbdə qalıb, əsas meyar isə “kiminsə adamı”, daha doğrusu “birincinin” adamı olmaqdır”.
Jurnalist diqqətə çatdırıb ki, Naxçıvanda dövlət qurumlarında mindən artıq vakansiya olsa da, işə qəbul yoxdur: “Ən maraqlısı isə budur ki, bu gün Naxçıvanda dövlət qurumlarında mindən artıq vakansiya mövcuddur. Vakansiyalar var, işsizlər var, amma işə qəbul yoxdur. Çünki bu yerlər, deyəsən, hələ “birincilərin” ətrafında boş-boş gəzən “xüsusi təyinatlı xilaskarlarını” gözləyir. Qısacası, Naxçıvanda “kadr islahatı” ifadəsini dəyişib “kadrsız idarəçilik” yazmaq daha düzgün olar!”
S.Əzimova vurğulayıb ki, Naxçıvanda Prezident İlham Əliyevin həyata keçirdiyi vətəndaş məmnuniyyəti siyasətinə zidd fəaliyyət ortaya qoyulur: “Açıq deməliyəm ki, Naxçıvanda Prezident İlham Əliyevin həyata keçirdiyi vətəndaş məmnuniyyəti siyasətinə zidd, üzdə görünməyən, lakin cəmiyyətdə narazılıq yaradan addımlar atılır. Belə yanaşmalar insanların dövlətə inamına mənfi təsir göstərir və Prezidentin müəyyən etdiyi siyasi kursun mahiyyətinə uyğun deyil. Ümid edirəm ki, bu məsələləri olduğu kimi ölkə rəhbərliyinə çatdırmaq məsuliyyəti daşıyan aidiyyəti qurumlar susmayacaq, obyektiv araşdırma aparacaq və lazımi addımlar atacaqlar”.
Xatırladaq ki, Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyində bir sıra vəzifəlilər tutduqları vəzifələrdən bugünlərdə ayrılıblar. Bu barədə Manset.az ötən gün xəbər yayıb. Bildirilib ki, son dəyişikliklərdən sonra nümayəndəliyin əməkdaşları Qoşqar Kamilli, Tural Murtuzəliyev və Pənah Mehdiyev nümayəndəliyin rəhbəri Ceyhun Cəlilovun onlara etdiyi təkliflə razılaşmayaraq, buna etiraz edərək vəzifələrindən ayrılıblar. Məlumata görə, işdən ayrılan hər üç şəxs Naxçıvan MR-da bir sıra mühüm dövlət proqramlarının və layihələrinin hazırlanmasında xüsusi xidmətləri ilə seçiliblər.
Qeyd edək ki, ötən ay qanunvericiliyə edilən dəyişiklik nəticəsində Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyinə birinci kateqoriya dövlət orqanı statusu verilib.
