Messi və Ronaldonun Dünya Çempionatı dövrü rəsmən başa çatdı?
Futbol üzrə dünya çempionatının İspaniyanın qələbəsi ilə başa çatıb.
Dünən futbol azarkeşləri üçün bir dövrün başa çatdığını bildirən Mətbuat Şurasının İdarə heyətinin üzvü, "Azxeber.com" informasiya portalının baş redaktoru Hacıbəy Heydərli Lionel Messi və Kriştiano Ronaldonun artıq Dünya Çempionatlarında meydana çıxmayacağını qeyd edib.
Xpress.az xəbər verir ki, onun sözlərinə görə, son 20 ilin futbol tarixini yazan, milyonlarla insana sevinc, həyəcan və ilham verən iki əfsanənin mundial hekayəsi sona çatıb.
Hacıbəy Heydərli bildirib ki, Messinin son dünya çempionatı qələbə ilə yekunlaşmayıb. O, bu mundialda qırdığı rekordlardan birinin özündən 12 yaş kiçik Kilian Mbappe tərəfindən yeniləndiyini, illər öncə qucağında şəkil çəkdirdiyi Lamin Yamalın isə sonradan ona rəqib kimi qalib gəldiyini vurğulayıb. Müəllif bunu futbolun nəsillərarası dəyişiminin rəmzi kimi qiymətləndirib.
O qeyd edib ki, futbolun ən gözəl tərəfi zamanın heç kim üçün dayanmayacağı, əfsanələrin yerini yeni ulduzların alacağı həqiqətidir. Onun fikrincə, bu günün uşaqları Mbappe, Erlinq Haaland və Lamin Yamal kimi futbolçuları öz qəhrəmanları hesab edəcəklər.
Heydərli əlavə edib ki, gələcəkdə uşaqlar Messi və Ronaldonun necə futbol oynadıqlarını soruşanda, həmin dövrü yaşayanlar təkcə statistikaları deyil, keçirdikləri hissləri və unudulmaz xatirələri bölüşəcəklər.
O vurğulayıb ki, Messi və Ronaldo sadəcə böyük futbolçular deyil, bütöv bir nəslin arzuları, mübahisələri, sevinc və kədəri, gecəyarısı izlənilən oyunları, unudulmayan finalları və ömürlük xatirələri olublar.
Hacıbəy Heydərli sonda bildirib ki, əvvəlki nəsil Pele və Maradonanın futboluna şahidlik etməklə fəxr edirdisə, bugünkü nəsil də Messi və Ronaldonun rəqabətini canlı izləmək şansına sahib olub.
"Messi də, Ronaldo da bir daha təkrarlanmayacaq. Hər şey üçün təşəkkürlər! Yaxşı ki, bizim uşaqlığımızın və gəncliyimizin qəhrəmanlarından oldunuz", – deyə o fikrini yekunlaşdırıb.
