Müdir maaş vermirsə, işçi nə etməlidir?
Əmək münasibətlərində işəgötürənin əsas öhdəliklərindən biri işçinin əməkhaqqını qanunvericilikdə nəzərdə tutulan müddətdə və tam həcmdə ödəməsidir. Lakin praktikada bəzi işçilər maaşlarının gecikdirilməsi, natamam ödənilməsi və ya ümumiyyətlə verilməməsi ilə üzləşirlər.
Maaş verilməyən zaman işçi nə etməlidir?
Demokrat.az-a bu barədə açıqlama verən hüquqşünas Əkrəm Həsənov bildirib ki, bu halda işçinin hüquqlarını qorumaq üçün qanunvericilikdə bir neçə hüquqi mexanizm nəzərdə tutulub:
“Birinci yol Azərbaycan Respublikasının Əmək Məcəlləsinin tələblərinə əməl olunmaması ilə bağlı Dövlət Əmək Müfəttişliyi Xidmətinə müraciət etməkdir. İşçi əməkhaqqının ödənilməməsi və ya gecikdirilməsi ilə bağlı şikayət edə bilər və müvafiq qurum məsələni araşdıraraq qanunvericiliyə uyğun tədbirlər görə bilər. İkinci yol isə məhkəməyə müraciət etməkdir. İşçi işəgötürənə qarşı əməkhaqqının ödənilməsi tələbi ilə iddia qaldırmaq hüququna malikdir. Bununla yanaşı, əməkhaqqının vaxtında verilməməsi nəticəsində yaranan gecikməyə görə də kompensasiya tələb edə bilər”.
Əkrəm Həsənov əlavə edib ki, qanunvericiliyə əsasən, işçi gecikdirilmiş məbləğə görə illik 5 faiz həcmində faizin də ödənilməsini tələb etmək hüququna malikdir:
“Qeyd etmək lazımdır ki, bu hüquq yalnız uzunmüddətli gecikmələrə aid deyil. Əgər əməkhaqqının ödənilməsi cəmi bir neçə gün gecikdirilibsə belə, işçi həm əsas məbləğin, həm də qanunvericilikdə nəzərdə tutulmuş faizin ödənilməsini tələb edə bilər. Bu baxımdan, işəgötürənin əməkhaqqını vaxtında ödəməməsi hüquqi məsuliyyət yaradan hal hesab olunur və işçi öz hüquqlarını həm inzibati, həm də məhkəmə qaydasında müdafiə edə bilər”.
Qeyd edək ki, Tovuz sakini Leyla Rəhimova maaşını tələb etdiyi üçün Yasamal rayonundakı "Laləli" uşaq bağçasının müdiri tərəfindən fiziki zorakılığa məruz qaldığını iddia edərək polisə müraciət edib. Bağça müdiri Lalə Əzimova isə işçiyə əl qaldırmadığını və aralarında yalnız mübahisə yarandığını bildirib.
