Qan xərçəngindən əziyyət çəkən uşaqlar üçün yeni təşəbbüs hazırlanır

Qan Donorları Assosiasiyasının sədri Fuad Əsgərov qan xərçəngindən əziyyət çəkən uşaqların müdafiəsi və onlara dəstəyin artırılması məqsədilə yeni addımlar atmağı planlaşdırır.

Fuad Əsgərov bildirib ki, qan xərçəngi ilə mübarizə aparan uşaqlar və onların ailələri ciddi çətinliklərlə üzləşirlər. Onun sözlərinə görə, xüsusilə azyaşlı xəstələrin müalicə prosesində həm tibbi, həm də mənəvi dəstəyə ehtiyacı var.

Assosiasiya sədrinin sözlərinə görə, bu qərarın verilməsinə səbəb bir müddət əvvəl Nihad adlı qan xərçəngindən əziyyət çəkən yeniyetmə ilə tanışlığı olub. Onun həyatını xilas etmək üçün göstərilən səylərə və dəstəyə baxmayaraq, yeniyetmənin həyatını xilas etmək mümkün olmayıb.

Fuad Əsgərov qeyd edib ki, Nihadın yaşadığı taledən sonra qan xərçəngindən əziyyət çəkən uşaqların müdafiəsi istiqamətində daha ciddi və sistemli addımlar atmaq qərarına gəlib.

“Artıq heç bir uşağın ölümünə, xüsusilə də aciz vəziyyətdə, ağrı və əzab içində həyatını itirməsinə göz yuma bilmərik”, — deyə Fuad Əsgərov bildirib.

Onun sözlərinə görə, yeni təşəbbüs çərçivəsində qan xərçəngindən əziyyət çəkən uşaqların müalicəsinə, qan təminatına və onların ailələrinə dəstəyin gücləndirilməsi istiqamətində layihələrin həyata keçirilməsi nəzərdə tutulur.

Assosiasiyanın əsas məqsədi xəstə uşaqların mübarizəsində ailələrin tək qalmamasını təmin etmək və onların müalicə imkanlarını genişləndirməkdir.